हडपसर (पुणे) : (दि. १८ फेब्रुवारी २०२६) Rayat Shikshan Sanstha संचलित S. M. Joshi College, हडपसर (पुणे–२८) येथे राष्ट्रीय सेवा योजना व इतिहास विभागाच्या संयुक्त विद्यमाने Chhatrapati Shivaji Maharaj यांच्या ३९६ व्या जयंतीनिमित्त विशेष व्याख्यानाचे आयोजन करण्यात आले.
या कार्यक्रमाचे प्रमुख पाहुणे सुप्रसिद्ध व्याख्याते डॉ. प्रमोद बाणखेले यांनी “स्वराज्याचे राजे छत्रपती शिवाजी महाराज यांचे बहुआयामी विचारविश्व : अप्रकाशित संदर्भ कागदपत्रातून” या विषयावर विद्यार्थ्यांना व प्राध्यापकांना मार्गदर्शन केले. विविध ऐतिहासिक पत्रांचा संदर्भ देत त्यांनी महाराजांचे कार्य, प्रशासनकौशल्य व दूरदृष्टी यांचे सखोल विश्लेषण केले. आजपर्यंत व्यापकपणे प्रकाशित न झालेल्या पत्रसंग्रहातील उल्लेखांच्या आधारे त्यांनी महाराजांच्या रयतेप्रती असलेल्या कर्तव्यनिष्ठेचा अभ्यासपूर्ण आढावा घेतला.
कार्यक्रमाच्या अध्यक्षस्थानी महाविद्यालयाचे प्राचार्य प्रा. (डॉ.) एकनाथ मुंढे उपस्थित होते. आपल्या अध्यक्षीय मनोगतात त्यांनी महाराजांच्या लोकाभिमुख राज्यकारभाराचे महत्त्व अधोरेखित केले. ‘रयतेचा राजा’ म्हणून महाराजांनी लोकांच्या मनात निर्माण केलेले स्थान आजही प्रेरणादायी असल्याचे त्यांनी नमूद केले. सह्याद्रीच्या कड्यासारखा दृढनिश्चय आणि गड-किल्ल्यांच्या माध्यमातून रयतेचे संरक्षण करणारा पराक्रमी राजा म्हणून त्यांनी महाराजांचा गौरव केला.
कार्यक्रमाची सुरुवात प्रतिमा पूजनाने करण्यात आली. प्रास्ताविक व स्वागत प्रा. (डॉ.) दिनकर मुरकुटे यांनी केले. पाहुण्यांचा परिचय राष्ट्रीय सेवा योजनेच्या कार्यक्रमाधिकारी डॉ. ज्योती किरवे यांनी करून दिला. प्रमुख पाहुण्यांचे स्वागत प्राचार्यांच्या हस्ते करण्यात आले. आभार प्रदर्शन डॉ. सोपान आयनार यांनी केले, तर सूत्रसंचालन डॉ. छाया सटके यांनी केले.
या कार्यक्रमाला राष्ट्रीय सेवा योजनेचे कार्यक्रम अधिकारी प्रा. अजित जाधव, आय.क्यू.ए.सी. समन्वयक प्रा. संजय अहिवळे, उपप्राचार्य डॉ. संजय जगताप तसेच महाविद्यालयातील विद्यार्थी व प्राध्यापक मोठ्या संख्येने उपस्थित होते.
कार्यक्रमानंतर राष्ट्रीय सेवा योजनेच्या स्वयंसेवकांनी प्रबोधनपर रॅली काढून छत्रपती शिवाजी महाराजांच्या विचारांचा जागर केला. महाराजांच्या विचारविश्वाचा सखोल व अभ्यासपूर्ण आढावा घेणारे हे व्याख्यान विद्यार्थी, अभ्यासक व इतिहासप्रेमींसाठी अत्यंत प्रेरणादायी व उपयुक्त ठरले.
Editer sunil thorat
