जिल्हा परिषद व पंचायत समिती सार्वत्रिक निवडणूक २०२६ : हवेली तालुक्यात EVM FLC प्रक्रिया यशस्वी…
हवेली (पुणे) : जिल्हा परिषद व पंचायत समिती सार्वत्रिक निवडणूक २०२६ च्या पार्श्वभूमीवर हवेली तालुक्यात वापरण्यात येणाऱ्या इलेक्ट्रॉनिक मतदान यंत्र (EVM) मशीनच्या FLC (First Level Checking) प्रक्रियेचे काम यशस्वीरीत्या पूर्ण करण्यात आले आहे.
ही संपूर्ण प्रक्रिया निवडणूक निर्णय अधिकारी डॉ. यशवंत माने यांच्या मार्गदर्शनाखाली पार पडली. EVM तपासणीची जबाबदारी तहसीलदार तृप्ती कोलते व तहसीलदार अर्चना निकम यांच्या नियंत्रणाखाली राबविण्यात आली. तर EVM कक्ष अधिकारी सचिन आखाडे, किशोर पाटील आणि गजानन किरवले यांनी या प्रक्रियेचे काटेकोर नियोजन करत प्रभावी अंमलबजावणी केली.
प्राप्त माहितीनुसार, जिल्हा परिषद व पंचायत समिती निवडणुकीसाठी प्राप्त झालेल्या सर्व EVM मशीनची FLC प्रक्रिया पूर्ण करण्यात आली आहे. यामध्ये कंट्रोल युनिट (CU) ची एकूण ४२५ युनिट्स तर बॅलेट युनिट (BU) ची १०१३ युनिट्स तपासण्यात आली.
निवडणूक प्रक्रिया पारदर्शक, सुरक्षित आणि विश्वासार्ह राहावी यासाठी FLC ही अत्यंत महत्त्वाची प्रक्रिया असून, तांत्रिक तज्ज्ञांच्या उपस्थितीत प्रत्येक मशीनची सखोल तपासणी करण्यात आली. FLC प्रक्रियेत अपात्र ठरलेल्या मशीन पुढील वापरासाठी वगळण्यात येणार असल्याची माहिती प्रशासनाकडून देण्यात आली आहे.
निवडणूक निर्णय अधिकारी, तहसीलदार तसेच EVM कक्ष अधिकाऱ्यांच्या समन्वयामुळे ही प्रक्रिया वेळेत, शांततेत आणि सुरळीतरीत्या पूर्ण झाल्याचे प्रशासनाकडून स्पष्ट करण्यात आले. आगामी निवडणुका निर्भय आणि विश्वासाच्या वातावरणात पार पडाव्यात यासाठी प्रशासन पूर्णतः सज्ज असल्याचेही यावेळी नमूद करण्यात आले.
Editer sunil thorat
