जनगणनेच्या कामास नकार ; लोणी काळभोरमधील पाच शिक्षकांवर गुन्हा दाखल…
लोणी काळभोर : केंद्र सरकारच्या जनगणना २०२७ च्या कामकाजात अडथळा निर्माण केल्याप्रकरणी लोणी काळभोर परिसरातील पाच शिक्षकांविरोधात गुन्हा दाखल करण्यात आला आहे. तहसील प्रशासनाच्या आदेशानंतरही संबंधित शिक्षक जनगणना कामासाठी हजर न राहिल्याने ही कारवाई करण्यात आली असून, शैक्षणिक व प्रशासकीय वर्तुळात मोठी खळबळ उडाली आहे.
याप्रकरणी ग्राम महसूल अधिकारी अमोल गव्हाणे यांनी लोणी काळभोर पोलीस ठाण्यात फिर्याद दिली आहे. त्यानुसार शिल्पा राजाभाऊ येरमाळकर, सुनिल दिलीप शेळके, शिवाजी संभाजी गायाकवाड, प्रदीप बबन पारधी आणि शन्नो जॉक्सन गगादे या पाच शिक्षकांविरोधात जनगणना अधिनियम १९४८ च्या कलम ११ अन्वये गुन्हा दाखल करण्यात आला आहे.
पोलीस सूत्रांकडून मिळालेल्या माहितीनुसार, लोणी काळभोर तहसील हद्दीत जनगणना २०२७ ची प्रक्रिया सुरू असून, या कामासाठी संबंधित शिक्षकांची नियुक्ती करण्यात आली होती. चार्ज ऑफिसर तथा तहसीलदार तृप्ती कोलते-पाटील यांनी शासनाच्या अधिकृत पोर्टलद्वारे तसेच पर्यवेक्षक अधिकाऱ्यांच्या माध्यमातून संबंधित शिक्षकांना आदेश बजावले होते. मात्र, आदेश मिळूनही संबंधित शिक्षकांनी जनगणना कामासाठी उपस्थित राहण्यास टाळाटाळ केली तसेच काम करण्यास नकार दिल्याचे प्रशासनाच्या निदर्शनास आले.
प्रशासनाच्या मते, संबंधित शिक्षकांनी शासनाच्या महत्त्वाच्या जनगणना प्रक्रियेत जाणूनबुजून अडथळा निर्माण केला. त्यामुळे अखेर महसूल विभागाने पोलिसांत धाव घेत कायदेशीर कारवाई सुरू केली.
या प्रकरणाचा पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक पूजा माळी करीत आहेत.
Editer sunil thorat
