पुणे : अज्ञात चोरट्यांनी उरुळी देवाची ग्रामपंचायत हद्दीत शासनाचा स्क्रॅप चा माल विकत घेऊन ठेवलेले गोडाऊन फोडल्याची घटना शुक्रवार (७ फेब्रुवारी) रोजी दुपारी तीन वाजण्याच्या सुमारास घडली असून या चोरीत ४० लाख रुपये किंमतीचे इलेक्ट्रीकल स्क्रॅप साहित्य चोरून नेले आहे. तर चोरीची संपूर्ण घटना सीसीटीव्ही कॅमेरात कैद झाली आहे.
याप्रकरणी नितीन कोठारी (वय ५१, मार्केटयार्ड पुणे) यांनी फुरसुंगी पोलीस ठाण्यात दिलेल्या फिर्यादीवरून अज्ञात चोरट्यांच्या विरोधात गुन्हा दाखल करण्यात आला आहे. पोलीस सुत्रांनी दिलेल्या माहितीनुसार, फ नितीन कोठारी हे व्यावसायिक असून त्यांचे उरुळी देवाची (ता. हवेली) ग्रामपंचायत हद्दीतील सर्व्हे नंबर २८६/१/६ येथे प्रणाम इंटरप्रायझेस या नावाने स्क्रॅप साहित्य ठेवण्याचे गोडावून आहे. यामध्ये शासनाकडून विकत घेतलेले इलेक्ट्रीकल स्क्रॅप, संगणक, मोबाईल व वायर इत्यादी लाखो रुपयांचे भंगाराचे साहित्य ठेवण्यात आले होते.
या गोडावूनच्या भिंतीचा पत्रा उचकटून, गोडावून मध्ये प्रवेश करून अज्ञात चोरट्यांनी ७ फेब्रुवारी रोजी त्यातील संगणक व मोबाईल मधील चांदीचे पार्ट, वायर मधील अल्युमिनियम धातू व तांब्याची तारा असा सुमारे ४० लाख रुपये किंमतीचे भंगार चोरून नेले आहे. पुढील तपास फुरसुंगी पोलीस ठाण्याचे पोलीस उपनिरीक्षक विष्णु देशमुख करीत आहेत.
