लोणी काळभोर (ता. हवेली) : चोरीस गेलेला किंमती ऐवज, हरवलेले मोबाईल तसेच विविध गुन्ह्यांमध्ये जप्त करण्यात आलेला तब्बल १८ लाख रुपये किमतीचा मुद्देमाल मूळ मालकांना परत करून लोणी काळभोर पोलिसांनी नागरिकांचा विश्वास अधिक दृढ केला आहे.
आपला हरवलेला ऐवज पुन्हा हाती मिळाल्याने अनेकांच्या चेहऱ्यावर आनंद फुलला, तर काहींच्या डोळ्यांत आनंदाश्रू तरळले. लोणी काळभोर विभागाच्या सहाय्यक पोलीस आयुक्त अनुराधा उदमले यांच्या हस्ते गुरुवारी (ता. ७) लोणी काळभोर पोलीस ठाण्यात मुद्देमाल वितरण कार्यक्रम पार पडला. यावेळी वरिष्ठ पोलीस निरीक्षक राजेंद्र पन्हाळे (लोणी काळभोर), अमोल मोरे (फुरसुंगी), बाबासाहेब निकम (मांजरी) यांच्यासह पोलीस हवालदार रवी आहेर, संदीप जोगदंड, बापू वाघमोडे पोलीस अमंलदार योगेश पाटील पोलीस अधिकारी, कर्मचारी आणि मोठ्या संख्येने नागरिक उपस्थित होते.
परत करण्यात आलेल्या मुद्देमालामध्ये सुमारे १५ लाख रुपये किमतीचे १० तोळे सोने, १ लाख रुपयांचे चांदीचे दागिने तसेच सव्वादोन लाख रुपये किमतीचे महागडे मोबाईल फोन यांचा समावेश होता. पोलिसांनी केलेल्या तांत्रिक विश्लेषण, कसून तपास आणि सतर्कतेमुळे हा मुद्देमाल हस्तगत करण्यात यश आले. वडकी येथील राहू खंडू मोडक यांना ९.३६० ग्रॅम वजनाचे सोन्याचे नेकलेस, तर कवडीपाट टोलनाका परिसरातील किसन बबन इंगळे यांना ३ ग्रॅम सोने व चांदीच्या पट्ट्या परत देण्यात आल्या.
कदमवाकवस्ती परिसरातील घरफोडी प्रकरणात आरोपीला अटक करून पोलिसांनी तीन तोळे सहा ग्रॅम वजनाचे सोन्याचे दागिने व एक लाख रुपये किमतीचे चांदीचे दागिने जप्त केले होते. हा मुद्देमाल मूळ मालक शांती शंकर सोलंखी यांना सुपूर्त करण्यात आला.
लोणी काळभोर पोलीस ठाण्याच्या हद्दीत चोरी अथवा गहाळ झालेले मोबाईल फोनही पोलिसांनी तांत्रिक तपासाच्या आधारे शोधून काढले. सुमारे एक लाख रुपये किमतीचे सहा मोबाईल फोन एकनाथ सोपान मेमाणे, रतनमाला नंदकुमार बोराटे, रमेश रामचंद्र जुगदळ, रेवती रमा गुप्ता, साजीद तांबोळी आणि दत्तात्रय ज्ञानोबा कोतवाल यांना परत करण्यात आले.
फुरसुंगी पोलीस ठाण्याच्या हद्दीतील २०२५ मधील मोठ्या घरफोडीचा छडा लावत पोलीस उपनिरीक्षक विष्णू देशमुख यांनी आरोपीला अटक केली होती. या कारवाईत चोरीस गेलेले ५ तोळे ६ ग्रॅम वजनाचे सोन्याचे दागिने हस्तगत करण्यात आले होते. हे दागिने मूळ मालक अभिजित मधुकर पठारे (रा. होळकरवाडी, ता. हवेली) यांना परत देण्यात आले. तसेच हरवलेले चार मोबाईल फोन शोधून मुस्कान जाधव, शाम मिसाळ, अक्षय कारंडे आणि सुधीर खताळ यांनाही सुपूर्त करण्यात आले. गुन्ह्यांचा छडा लावत नागरिकांचा विश्वास जपणाऱ्या लोणी काळभोर आणि फुरसुंगी पोलिसांच्या या उल्लेखनीय कामगिरीचे सर्वत्र कौतुक होत आहे.
Editer sunil thorat
