दस्त नोंदणी तीन दिवस ठप्प; सर्व्हर देखभाल दुरुस्तीसाठी सेवा बंद
पुणे : खरेदी-विक्रीसाठी करण्यात येणाऱ्या दस्त नोंदणीचे सर्व्हर गुरुवार (दि. १४) मध्यरात्रीपासून रविवारी (दि. १७) मध्यरात्रीपर्यंत बंद राहणार आहे. त्यामुळे या कालावधीत दस्त नोंदणी होऊ शकणार नाही, अशी माहिती नोंदणी उपमहानिरीक्षक उदयराज चव्हाण यांनी दिली.
नोंदणी व मुद्रांक शुल्क विभागाच्या ‘आय सरिता’ सर्व्हरच्या देखभाल दुरुस्तीसाठी हा निर्णय घेण्यात आला असून, या कालावधीत दस्त नोंदणीसह इतर सर्व सेवा बंद राहतील. शुक्रवारी (१५ ऑगस्ट) स्वातंत्र्यदिनाची सार्वजनिक सुटी, तर शनिवारी व रविवारी २७ पैकी २२ दुय्यम निबंधक कार्यालये बंद असतात. केवळ पाच कार्यालयांमधून दस्त नोंदणी सुरु असली तरी सर्व्हर बंद असल्याने ती शक्य होणार नाही.
या पाच कार्यालयांमध्ये दररोज सरासरी २०० दस्तांची नोंदणी होते. सलग तीन दिवस सुटी असूनही, सर्व्हर देखभाल दुरुस्तीमुळे या कामकाजावर तात्पुरता परिणाम होणार आहे. देखभाल पूर्ण झाल्यानंतर नोंदणी प्रक्रियेला अधिक वेग येईल, असा विश्वास अधिकाऱ्यांनी व्यक्त केला. नागरिकांनी या कालावधीची नोंद घ्यावी, असे आवाहन पुणे शहर सहजिल्हा निबंधक संतोष हिंगाणे यांनी केले.
Editer Sunil thorat
