कदमवाकवस्ती (ता. हवेली) : स्वच्छ, कचरा मुक्त आणि प्रदूषणमुक्त गाव घडवण्याच्या उद्देशाने कदमवाकवस्ती ग्रामपंचायतीने महत्त्वाकांक्षी ‘स्वच्छ कदमवाकवस्ती मिशन’ राबवण्यास अधिकृतपणे सुरुवात केली आहे. ग्रामपंचायत परिसरातील दीर्घकाळ प्रलंबित असलेल्या कचरा व्यवस्थापन समस्येवर ठोस उपाययोजना म्हणून या उपक्रमाकडे पाहिले जात आहे. या मिशनचा शुभारंभ मा. सरपंच चित्तरंजन गायकवाड यांच्या मार्गदर्शनाखाली वार्ड क्र. १ मधील हनुमान मंदिर येथे सायंकाळी पाच वाजता केला गेला. यावेळी नागरिक, ग्रामपंचायत पदाधिकारी आणि स्वच्छता कर्मचारी मोठ्या संख्येने उपस्थित होते.
डोअर-टू-डोअर कचरा कलेक्शनची अंमलबजावणी…
गावातील प्रत्येक घरातून नियमितपणे कचरा उचलण्यासाठी डोअर-टू-डोअर कचरा संकलन सेवा सुरू करण्यात आली आहे. यामुळे गावातील रस्त्यांवर, ओपन स्पेसमध्ये व सार्वजनिक ठिकाणी कचरा टाकण्याचे प्रमाण कमी होण्यास मदत होणार आहे. ग्रामपंचायतीने या कामासाठी स्वतंत्र वाहनाची नेमणूक केली असून कलेक्शन वेळापत्रक नागरिकांना कळविण्यात आले आहे.
सरपंच चित्तरंजन गायकवाड म्हणाले, “स्वच्छता ही केवळ ग्रामपंचायतीची जबाबदारी नाही, तर प्रत्येक नागरिकाची कर्तव्यभावना आहे. नियमित कचरा संकलनामुळे गावातील आरोग्य व्यवस्थाही सुधारेल.”
स्वच्छता कर्मचाऱ्यांची नियुक्ती आठवड्यात संपूर्ण गाव स्वच्छ… गावातील रस्ते, मुख्य सरकारी रस्ते, सार्वजनिक ओपन स्पेस, मंदिरे व सामुदायिक स्थळे यांच्या स्वच्छतेसाठी नवीन स्वच्छता कर्मचारी नियुक्त करण्यात आले आहेत. हे कर्मचारी दररोज एक वार्ड अशा पद्धतीने स्वच्छता करून आठवड्यात संपूर्ण गाव ताजेतवाने ठेवतील. ग्रामपंचायतीने स्वच्छतेचे स्वतंत्र निरीक्षण पथकही तयार केले आहे.
‘माझे गाव, माझी जबाबदारी’ नागरिकांना आवाहन…
गावातील सोसायट्या, वाड्या, गल्ली, वस्ती स्तरावर नागरिकांनी स्वतःहून परिसर स्वच्छ ठेवावा, असे आवाहन करण्यात आले आहे. चित्तरंजन गायकवाड यांनी पुढे सांगितले. “ग्रामपंचायतीचा प्रयत्न तेव्हाच यशस्वी होईल, जेव्हा प्रत्येक घर आपल्या दारासमोरील जागा स्वच्छ ठेवेल. आपण मिळून कदमवाकवस्तीला आदर्श गाव बनवू शकतो.”
आगामी उपक्रमांची रूपरेषा जाहीर…
ग्रामपंचायतीने पुढील टप्प्यात खालील कामे राबवण्याचा मनोदय व्यक्त केला आहे. त्यामध्ये ओल्या–सुका कचऱ्याचे विभाजन सक्तीने लागू, घरगुती कंपोस्टिंगला प्रोत्साहन, प्लास्टिक बंदीबाबत जनजागृती मोहीम, स्वच्छता अॅम्बेसेडर नियुक्ती, शाळांमधून विद्यार्थ्यांचा सहभाग वाढवणे आरोग्य विभागाच्या सहकार्याने गावात स्वच्छता व डेंग्यू प्रतिबंधक तपासणी मोहीमही घेण्याचे नियोजन आहे.
नागरिकांचा उत्स्फूर्त प्रतिसाद…
उद्घाटनावेळी उपस्थित नागरिकांनी या उपक्रमाचे स्वागत केले. काही नागरिकांनी नियमित स्वच्छतेबाबत अपेक्षा मांडल्या तर काहींनी सार्वजनिक ठिकाणी सीसीटीव्ही बसविण्याची मागणी केली.
ग्रामपंचायतीने सूचित केले की, तक्रारी, सूचना व प्रतिसाद नोंदवण्यासाठी स्वतंत्र संपर्क क्रमांक व नोंदवही ठेवण्यात येणार आहे. कदमवाकवस्ती ग्रामपंचायत आणि नागरिकांच्या संयुक्त प्रयत्नातून गाव अधिक स्वच्छ, आरोग्यदायी आणि सुंदर करण्याचा संकल्प दृढ झाला आहे.
यावेळी मा. चित्तरंजन गायकवाड, मा. गौरी गायकवाड, ग्रामपंचायत सदस्य, कर्मचारी व स्थानिक नागरिक उपस्थित होते.
Editer sunil thorat
