लग्नाआधी मुलगी गरोदर; वादातून प्रियकराचा मृत्यू ; हैदराबादमध्ये हृदयद्रावक घटना…
हैदराबाद : हैदराबादमध्ये लग्नाआधी गर्भधारणा झाल्याच्या मुद्द्यावरून निर्माण झालेल्या कौटुंबिक वादातून एका तरुणाचा मृत्यू झाल्याची हृदयद्रावक घटना समोर आली आहे. के. ज्योती श्रवण साई हा गांधीमैसम्मा येथील खाजगी अभियांत्रिकी महाविद्यालयात दुसऱ्या वर्षात शिकणारा विद्यार्थी. साईचे त्याच्या बालसखी असलेल्या एका तरुणीसोबत गेल्या काही काळापासून प्रेमसंबंध होते. परस्पर सहमतीने असलेले हे नाते पुढे गेले आणि सोमवारी त्या मुलीला आपली गर्भधारणा झाल्याची खात्री पटली.
अचानक प्राप्त झालेल्या या परिस्थितीत तिने पुढील दिवशी म्हणजे मंगळवारी धैर्य एकवटून ही गोष्ट आपल्या आईला सांगितली. मुलीच्या तोंडून लग्नाआधी गर्भवती असल्याचे समजताच आई संतापली. तिने मुलीस कठोर शब्दांत जाब विचारला व अधिक चौकशी केली. तेव्हा मुलीने साईसोबत प्रेमसंबंध असल्याचे स्पष्ट कबूल केले. संतापाच्या भरात आईने साईला घरी येण्यासाठी बोलावणे पाठवले.
साई सकाळी सुमारे ११ वाजता वसतिगृहातून मुलीच्या घरी पोहोचला. घरात पोहोचताच मुलीच्या आईने त्याला आणि मुलीला गर्भधारणेच्या मुद्द्यावरून जोरदार फटकारले. घरातील तणाव वाढत गेला आणि वादाची तीव्रता चिघळली. अचानक संतापाच्या भरात आईने जवळच पडलेली बॅट उचलली आणि मुलीला मारहाण करण्यास सुरुवात केली. मुलगी रडत असूनही आईचा संताप कमी झाला नाही.
मुलीला वाचवण्यासाठी साई तातडीने मध्ये पडला. मात्र त्या क्षणी आईच्या हातातील बॅट जोरात फिरून साईच्या डोक्याला बसली. त्याच्या डोक्यावर गंभीर दुखापत झाली. त्या धक्क्यात तो मागे कोसळला. घरात काही काळ गोंधळ निर्माण झाला आणि नंतर तो वेगळ्या खोलीत जाऊन झोपला. मुलीचीही प्रकृती ढासळली होती.
दरम्यान, संध्याकाळी मुलीला मारहाणीमुळे असह्य वेदना जाणवू लागल्या. त्यामुळे कुटुंबीयांनी तिला तातडीने रुग्णालयात दाखल केले. उपचार घेऊन मध्यरात्रीच्या सुमारास ती घरी परतली. घरात वातावरण तणावपूर्णच होते.
पहाटे साधारण ३ वाजण्याच्या सुमारास घरातील सदस्यांना साईच्या खोलीतून हलक्या कुरकुरण्याचा आवाज ऐकू आला. तेथे जाऊन पाहिले असता त्याला श्वास घेण्यास तीव्र त्रास होत असल्याचे दिसले. तातडीने त्याला रुग्णालयात नेण्यात आले. तथापि, डॉक्टरांनी तपासणी करून साईला मृत घोषित केले. डोक्याला लागलेल्या गंभीर दुखापतीमुळे त्याचे प्राण गेले असण्याची शक्यता डॉक्टरांकडून व्यक्त करण्यात आली आहे.
अमीनपूर पोलिसांनी या प्रकरणाचा तपास सुरू केला असून मुलीच्या आईच्या हालचालींची, वादाची आणि त्या वेळी घडलेल्या घटनाक्रमाची सखोल चौकशी करण्यात येत आहे. अचानक उभ्या राहिलेल्या परिस्थितीत घडलेली ही घटना परिसरात मोठ्या प्रमाणावर चर्चा आणि दुःखाचा विषय बनली आहे.
Editer sunil thorat
