‘पुणे ग्रँड टूर’मुळे पुण्याचे नाव जागतिक पातळीवर ; उपमुख्यमंत्री अजित पवार, बालेवाडी येथे आंतरराष्ट्रीय सायकल स्पर्धेच्या अंतिम टप्प्याचा शानदार शुभारंभ…
पुणे : ‘पुणे ग्रँड टूर’ या आंतरराष्ट्रीय दर्जाच्या सायकल स्पर्धेमुळे पुणे जिल्ह्याचे नाव जागतिक पातळीवर पोहोचले असून, या स्पर्धेच्या आयोजनासाठी प्रशासनाने उत्कृष्ट नियोजन करत दर्जेदार पायाभूत सुविधा उभारल्या आहेत. केंद्र सरकारसह देश-विदेशातील सायकलपटूंनी या आयोजनाबाबत समाधान व्यक्त केले असल्याचे प्रतिपादन राज्याचे उपमुख्यमंत्री अजित पवार यांनी केले.
उपमुख्यमंत्री अजित पवार आणि केंद्रीय क्रीडा व युवक कल्याण राज्यमंत्री रक्षा खडसे यांच्या हस्ते ‘पुणे ग्रँड टूर’च्या अंतिम टप्प्याचा श्री शिवछत्रपती क्रीडा संकुल, म्हाळुंगे–बालेवाडी येथे झेंडी दाखवून शुभारंभ करण्यात आला.
यावेळी खासदार मेधा कुलकर्णी, आंतरराष्ट्रीय सायकलिंग संघटना (युसीआय)च्या महासंचालक अमिना लानाया, आशियाई सायकलिंग महासंघाचे अध्यक्ष दातो अमरजीत सिंग गिल, सायकलिंग फेडरेशन ऑफ इंडियाचे महासचिव दातो मनिंदर पाल सिंग, प्रसिद्ध अभिनेता अमीर खान, पिंपरी-चिंचवड शहर पोलीस आयुक्त विनयकुमार चौबे, क्रीडा व युवक सेवा आयुक्त शीतल तेली उगले, पीएमआरडीए आयुक्त योगेश म्हसे, जिल्हाधिकारी जितेंद्र डुडी, बजाज ऑटोचे कर विभागाचे उपाध्यक्ष चेतन जोशी यांच्यासह विविध क्षेत्रांतील मान्यवर उपस्थित होते.
उपमुख्यमंत्री अजित पवार म्हणाले, बजाज पुणे ग्रँड टूर या आंतरराष्ट्रीय सायकल स्पर्धेचे आयोजन केंद्र व राज्य शासनाच्या संयुक्त प्रयत्नातून पुणे, पिंपरी-चिंचवड शहरासह जिल्ह्याच्या ग्रामीण भागात १९ ते २३ जानेवारी २०२६ या कालावधीत करण्यात आले. या स्पर्धेला शहरासह ग्रामीण भागातील क्रीडारसिकांनी मोठ्या उत्साहात प्रतिसाद दिला. युवक, युवती, महिला, शेतकरी, विद्यार्थी अशा सर्व घटकांचा सहभाग या स्पर्धेत दिसून आला. यापूर्वीही पुण्यात झालेल्या आंतरराष्ट्रीय स्पर्धांना पुणेकरांनी उत्स्फूर्त प्रतिसाद दिला आहे.
आगामी ऑलिम्पिक स्पर्धांचे यजमानपद भारताला मिळावे यासाठी पंतप्रधान नरेंद्र मोदी प्रयत्नशील असून, क्रीडा क्षेत्राला चालना देण्यासाठी आणि जागतिक दर्जाचे खेळाडू घडावेत या उद्देशाने श्री शिवछत्रपती क्रीडा संकुल, म्हाळुंगे–बालेवाडी येथे अत्याधुनिक सुविधा उभारण्यात आल्या आहेत. राज्यात व देशात अधिकाधिक आंतरराष्ट्रीय दर्जाच्या क्रीडा स्पर्धांचे आयोजन करण्यासाठी राज्य शासन सातत्याने प्रयत्न करेल, असेही त्यांनी स्पष्ट केले.
केंद्रीय राज्यमंत्री रक्षा खडसे म्हणाल्या, महाराष्ट्र सरकार व जिल्हा प्रशासनाने ‘पुणे ग्रँड टूर’चे आंतरराष्ट्रीय दर्जाचे यशस्वी आयोजन केल्याबद्दल अत्यंत आनंद वाटतो. पंतप्रधान नरेंद्र मोदी यांच्या ‘विकसित भारत–२०४७’ या संकल्पनेच्या पूर्ततेत क्रीडा क्षेत्राचा मोठा वाटा असणार आहे. क्रीडा क्षेत्राला ‘सॉफ्ट पॉवर’च्या माध्यमातून पुढे नेण्याचे काम सुरू असून, या स्पर्धेमुळे क्रीडा पर्यटनाला चालना मिळत आहे. भारत क्रीडा पर्यटनाचे जागतिक केंद्र म्हणून पुढे येत आहे, ही अभिमानाची बाब आहे.
यावेळी अभिनेता अमीर खान यांनीही ‘पुणे ग्रँड टूर’च्या यशस्वी आयोजनाबद्दल आयोजकांचे अभिनंदन केले.
दरम्यान, जर्मनीचे आंतरराष्ट्रीय सायकलपटू बेंडकी बेकर यांना मानवंदना (गार्ड ऑफ ऑनर) देण्यात आली. बेकर यांनी सलग २० वर्षे विविध आंतरराष्ट्रीय स्पर्धांमध्ये सायकलपटू म्हणून सहभाग घेतला असून, या स्पर्धेनंतर ते सायकलिंगमधून निवृत्त होत आहेत.
Editer sunil thorat
