लोणी काळभोर, ता. ६ : कौटुंबिक वादातून पत्नीला जीवे ठार मारण्याची धमकी देत घरात धारदार शस्त्र लपवून ठेवल्याच्या गंभीर प्रकाराचा लोणी काळभोर परिसरात उलगडा झाला आहे. या प्रकरणात लोणी काळभोर पोलिसांनी मध्यरात्री धाडसी कारवाई करत आरोपीला ताब्यात घेतले असून, घरातून सुमारे ७१ सेंटीमीटर लांबीची धारदार तलवार जप्त करण्यात आली आहे. पोलिसांच्या तत्परतेमुळे संभाव्य मोठा अनर्थ टळल्याचे सांगितले जात आहे.
पोलिसांनी दिलेल्या माहितीनुसार, प्राजक्ता मनीष पाबळे यांनी आपल्या पतीविरुद्ध तक्रार दाखल केली होती. पती मनीष बाबुराव पाबळे (वय ४१, रा. पाषाणकर बाग, लोणी काळभोर) याने बंदुकीने ठार मारण्याची धमकी दिल्याचे त्यांनी तक्रारीत नमूद केले होते. या धमकीचे व्हॉईस रेकॉर्डिंगही त्यांनी पुरावा म्हणून पोलिसांकडे सादर केले होते. तक्रारीतील गंभीर बाब लक्षात घेऊन पोलिसांनी तातडीने कारवाईची दिशा ठरवली.
वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक दिगंबर सोनटक्के यांच्या पथकाने मंगळवार (५ मे) रोजी पहाटे पावणे दोन वाजण्याच्या सुमारास आरोपीच्या घरावर छापा टाकला. कारवाईदरम्यान सुरुवातीला आरोपीने पोलिसांना झडती घेण्यास विरोध केला तसेच टाळाटाळ करण्याचा प्रयत्न केला. मात्र पोलिसांनी त्याला कायदेशीर प्रक्रिया समजावून सांगत परिस्थिती नियंत्रणात आणली आणि घराची सखोल तपासणी सुरू केली.
झडतीदरम्यान घरातील लोखंडी कपाटात लपवून ठेवलेली एक धारदार लोखंडी तलवार पोलिसांच्या हाती लागली. ही तलवार सुमारे ७१ सेंटीमीटर लांबीची असून तिच्या पात्याला तीक्ष्ण धार असल्याचे आढळून आले. संभाव्य गुन्हेगारी वापराच्या पार्श्वभूमीवर पोलिसांनी ही तलवार तात्काळ जप्त केली.
या प्रकरणी पोलीस अंमलदार निखील श्रीरंग मेमाणे यांनी सरकारतर्फे लोणी काळभोर पोलीस ठाण्यात फिर्याद दिली आहे. त्यानुसार आरोपी मनीष पाबळे याच्याविरुद्ध संबंधित कलमान्वये गुन्हा दाखल करण्यात आला आहे. तसेच पुणे शहर पोलीस प्रशासनाने लागू केलेल्या प्रतिबंधक आदेशाचे उल्लंघन केल्याचाही ठपका त्याच्यावर ठेवण्यात आला आहे.
दरम्यान, या घटनेमुळे परिसरात काही काळ तणावाचे वातावरण निर्माण झाले होते. मात्र पोलिसांनी वेळीच हस्तक्षेप करत परिस्थिती नियंत्रणात आणली. कौटुंबिक वादातून गंभीर गुन्ह्यांकडे वळण्याची प्रवृत्ती वाढत असल्याने अशा प्रकरणांकडे गांभीर्याने पाहण्याची गरज असल्याचेही पोलीस अधिकाऱ्यांनी नमूद केले.
या घटनेचा पुढील तपास लोणी काळभोर पोलीस करत आहेत.
Editer sunil thorat
