अपंग तरुणीवरील अत्याचार प्रकरणातील आरोपी जेरबंद ; पौड पोलिसांची धडाकेबाज कारवाई…
पौड, ता. ७ : मुळशी तालुक्यातील मांडवखडक (वेगरे) येथे १९ वर्षीय मतिमंद व अपंग तरुणीवर अत्याचार करून फरार झालेल्या आरोपीला पौड पोलिसांनी अवघ्या काही दिवसांत जेरबंद केले आहे. डोंगराळ भागात लपून बसलेल्या आरोपीचा शोध घेत पोलिसांनी लोणावळा ग्रामीण हद्दीतील पवनानगर येथून त्याला अटक केली.
गजानन भागू पवार (वय २६, रा. मांडवखडक वेगरे, ता. मुळशी) असे अटक करण्यात आलेल्या आरोपीचे नाव आहे. याप्रकरणी पौड पोलीस ठाण्यात गुन्हा रजिस्टर क्रमांक १२९/२०२६ अन्वये भारतीय न्याय संहिता कलम ६४, ६४(१), ६४(२)(i)(k), ३५१ नुसार गुन्हा दाखल करण्यात आला आहे.
पोलिसांनी दिलेल्या माहितीनुसार, २३ एप्रिल २०२६ रोजी दुपारी साडेएकच्या सुमारास पीडित तरुणी घरात एकटी असताना आरोपीने तिच्यावर जबरदस्ती अत्याचार केला. पीडित तरुणी मतिमंद व अपंग असल्याने या घटनेने परिसरात संताप व्यक्त होत होता. याप्रकरणी १ मे रोजी पौड पोलीस ठाण्यात गुन्हा दाखल करण्यात आला होता.
घटनेचे गांभीर्य लक्षात घेऊन वरिष्ठ पोलीस निरीक्षक संतोष गिरीगोसावी यांनी तातडीने तपास पथके तयार केली. आरोपी हा कातकरी समाजातील असून डोंगराळ भागात सतत ठिकाण बदलत असल्याने त्याचा शोध घेणे पोलिसांसमोर मोठे आव्हान होते. पोलिसांनी आरोपीचे नातेवाईक, ओळखीची ठिकाणे तसेच तो मजुरीसाठी जात असलेल्या परिसरांची माहिती गोळा करत शोधमोहीम सुरू ठेवली.
दरम्यान, आरोपी लोणावळा ग्रामीण पोलीस ठाण्याच्या हद्दीतील पवनानगर परिसरात असल्याची खात्रीशीर माहिती पोलिसांना मिळाली. त्यानुसार सहाय्यक पोलीस निरीक्षक सुधीर कदम, पोलीस हवालदार रॉकी देवकाते, सिद्धेश पाटील, जगदाळे, सुरवसे तसेच पोलीस शिपाई शिंदे यांच्या पथकाने खासगी वाहनातून पवनानगर येथे धाव घेत सापळा रचला. लोणावळा ग्रामीण पोलिसांच्या मदतीने आरोपीला ताब्यात घेण्यात आले.
सदर आरोपीला अटक करण्यात आली असून पुढील तपास पौड पोलीस स्टेशनमार्फत सुरू आहे.
“महिला आणि बालकांवरील अत्याचाराच्या घटनांमध्ये पोलीस प्रशासन अत्यंत संवेदनशील असून अशा गुन्ह्यांतील आरोपींना कोणत्याही परिस्थितीत सोडले जाणार नाही. अत्यंत प्रतिकूल परिस्थितीत डोंगराळ भागात शोध घेऊन पथकाने आरोपीला जेरबंद केले,” अशी माहिती वरिष्ठ पोलीस निरीक्षक संतोष गिरीगोसावी यांनी दिली.
Editer sunil thorat
