कुंजीरवाडीत एस.टी. थांब्यासाठी जोरदार मागणी ; स्वप्नील कुंजीर पाटील यांचे पुणे विभागीय अधिकाऱ्यांना निवेदन…
कुंजीरवाडी (ता. हवेली) : हवेली तालुक्यातील वेगाने विकसित होत असलेल्या कुंजीरवाडी गावात महाराष्ट्र राज्य मार्ग परिवहन महामंडळाचा (एस.टी.) अधिकृत थांबा सुरू करण्यात यावा, या प्रमुख मागणीसाठी शिवसेना हवेली तालुका प्रमुख स्वप्नील सुमनताई वसंतराव कुंजीर पाटील यांनी पुणे विभागीय मुख्य अधिकारी अरुण भगतसिंग सिया यांना निवेदन सादर केले. यावेळी सामाजिक कार्यकर्ते गणेश कुंजीर हे देखील उपस्थित होते.
कुंजीरवाडी हे गाव सध्या व्यापारी, औद्योगिक आणि लोकसंख्येच्या दृष्टीने झपाट्याने विस्तारत असून, राज्यातील विविध भागांतून अनेक कुटुंबे येथे स्थायिक झाली आहेत. विशेषतः सोलापूर, धाराशिव, बीड, लातूर, नांदेड, परभणी, अहिल्यानगर तसेच मराठवाडा आणि विदर्भातील अनेक नागरिक रोजगार, व्यवसाय व उदरनिर्वाहासाठी कुंजीरवाडीत वास्तव्यास आहेत. मात्र, गावात एस.टी.चा अधिकृत थांबा नसल्यामुळे या नागरिकांना आपल्या मूळ गावी जाण्यासाठी मोठ्या गैरसोयीचा सामना करावा लागत आहे.
सध्या नागरिकांना एस.टी. पकडण्यासाठी अनेक किलोमीटर अंतर प्रवास करावा लागत असून, महिला, ज्येष्ठ नागरिक, विद्यार्थी आणि कामगार वर्गाला याचा विशेष त्रास सहन करावा लागत आहे. कुंजीरवाडीपासून जवळपास सात किलोमीटर परिसरात कोणताही सोयीस्कर एस.टी. थांबा उपलब्ध नसल्यामुळे नागरिकांना खासगी वाहनांचा आधार घ्यावा लागतो. त्यामुळे आर्थिक भुर्दंडासोबतच वेळेचाही मोठा अपव्यय होत असल्याची बाब निवेदनात अधोरेखित करण्यात आली आहे.
तसेच गाणगापूर, तुळजापूर, पंढरपूर, अक्कलकोट यांसारख्या धार्मिक स्थळांना जाणाऱ्या भाविकांनाही मोठ्या अडचणींना सामोरे जावे लागत असल्याचे सांगण्यात आले. अनेक ज्येष्ठ नागरिक आणि महिला भाविकांना रात्री-अपरात्री प्रवास करताना सुरक्षिततेचा प्रश्न निर्माण होत असल्याने गावात थेट एस.टी. थांबा असणे अत्यंत गरजेचे असल्याचे मत व्यक्त करण्यात आले.
गावातील सरकारी दवाखान्याजवळ एस.टी. थांबा सुरू झाल्यास विद्यार्थ्यांना शिक्षणासाठी, महिलांना दैनंदिन प्रवासासाठी, कामगारांना रोजगारासाठी तसेच व्यापाऱ्यांना व्यवसायासाठी मोठा दिलासा मिळेल. वाढती लोकसंख्या, गावाचा व्यापारी विस्तार आणि नागरिकांची गरज लक्षात घेता प्रशासनाने तातडीने सकारात्मक निर्णय घेऊन कुंजीरवाडी येथे एस.टी. थांबा मंजूर करावा, अशी मागणी स्वप्नील कुंजीर पाटील यांनी केली.
दरम्यान, पुणे विभागीय मुख्य अधिकारी अरुण भगतसिंग सिया यांच्याशी यासंदर्भात सविस्तर चर्चा करण्यात आली. कुंजीरवाडीतील नागरिकांच्या अडचणी आणि वाढती प्रवासी संख्या लक्षात घेऊन लवकरात लवकर एस.टी. थांबा सुरू करण्याबाबत सकारात्मक विचार करण्यात यावा, अशी विनंती यावेळी करण्यात आली. गावातील नागरिकांकडूनही या मागणीला मोठा पाठिंबा मिळत असून, प्रशासनाने त्वरित कार्यवाही करावी अशी अपेक्षा व्यक्त होत आहे.
Editer sunil thorat
