कदमवाकवस्ती (ता. हवेली) : येथील MIT महाविद्यालयात विद्यार्थ्यांच्या सर्वांगीण विकासासाठी कार्य करणारा अस्त्र (Alliance of Students for Tradition, Research and Advancements) हा टेक्नो-कल्चरल क्लब अल्पावधीतच एक प्रभावी आणि प्रेरणादायी व्यासपीठ म्हणून नावारूपास आला आहे. तंत्रज्ञान, परंपरा आणि आधुनिक विचारधारा यांचा समन्वय साधत, वर्गखोल्यांच्या पलीकडे जाऊन प्रत्यक्ष अनुभवातून शिक्षण देण्याचे कार्य अस्त्रच्या माध्यमातून करण्यात येत आहे.
अस्त्रची संकल्पना विद्यार्थ्यांमध्ये संशोधनवृत्ती, समस्या-निराकरण कौशल्य, उद्योजकीय दृष्टिकोन आणि सांस्कृतिक जाणीव विकसित करण्याच्या उद्देशाने मांडण्यात आली आहे. तंत्रज्ञानाच्या साहाय्याने परंपरेचे जतन करणे आणि संस्कृतीला आधुनिकतेची जोड देणे, हे क्लबचे मूलभूत तत्त्व आहे. विद्यार्थ्यांना त्यांच्या कल्पना मुक्तपणे मांडण्याची, संघभावनेतून त्या प्रत्यक्षात उतरवण्याची आणि समाजोपयोगी, नावीन्यपूर्ण प्रकल्पांवर काम करण्याची संधी येथे दिली जाते.
या क्लबची स्थापना वेदांत प्रितम घुले यांनी केली असून, ते संस्थापक व अध्यक्ष म्हणून कार्यरत आहेत. विद्यार्थ्यांसाठी एक सुसंगत, संरचित आणि सर्वसमावेशक व्यासपीठ निर्माण करण्याची त्यांची दूरदृष्टी अस्त्रच्या कार्यातून स्पष्टपणे दिसून येते. नेतृत्वगुणांचा विकास, जबाबदारीची जाणीव आणि संघटन कौशल्य वृद्धिंगत करण्यावर त्यांचा विशेष भर आहे.
अस्त्रला सक्षम विद्यार्थी नेतृत्व संघाची भक्कम साथ लाभली आहे. विराज धुमाळ (उपाध्यक्ष), रोहन खांडवाणी (सरचिटणीस), यशस्वी सिसोदिया (संयुक्त सचिव), सुदर्शन पाटील (कोषाध्यक्ष) आणि आर्यन नवले (कार्यकारी सदस्य) हे पदाधिकारी विविध उपक्रमांच्या यशस्वी आयोजनात मोलाची भूमिका बजावत आहेत. त्यांच्या एकत्रित प्रयत्नांमुळे कदमवाकवस्ती येथील MIT मध्ये अस्त्रने एक विश्वासार्ह ओळख निर्माण केली आहे.
स्थापनेपासून आतापर्यंत अस्त्रने अनेक नावीन्यपूर्ण उपक्रमांचे आयोजन केले आहे. ‘शोध’ हा तीन दिवसीय कॅम्पस प्रॉब्लेम हॅकथॉन ७ ते ९ मे दरम्यान MIT, कदमवाकवस्ती येथे क्रियेया संस्थेसोबत संयुक्तपणे आयोजित करण्यात आला. या हॅकथॉनमधून विद्यार्थ्यांनी तंत्रज्ञानाच्या मदतीने प्रत्यक्ष जीवनातील समस्या सोडवण्याचे अभिनव प्रयोग सादर केले. उद्योगतज्ज्ञ व वरिष्ठ विद्यार्थ्यांच्या मार्गदर्शन सत्रांनी कार्यक्रम अधिक परिणामकारक ठरला.
तसेच ‘ओणवेशम’ हा ओणम थीमवर आधारित टेक्नो-कल्चरल कार्यक्रम, ‘अंकुरम’ हा राज्यस्तरीय शालेय हॅकथॉन आणि ‘आरंभ – उद्घाटन सोहळा’ हे सर्व उपक्रम MIT, कदमवाकवस्ती येथे उत्साहात पार पडले. ‘आरंभ’ कार्यक्रमास PSI उदय काळभोर, शाहीर महेश खुळपे आणि केंद्रीय शिक्षण व युवा सक्षमीकरण समितीचे अध्यक्ष शिवराज काळभोर यांची प्रमुख उपस्थिती लाभली.
परंपरा, संशोधन आणि प्रगती या त्रिसूत्रीवर आधारित अस्त्रचे कार्य विद्यार्थ्यांना केवळ सहभागी बनवत नाही, तर त्यांना नेतृत्व स्वीकारण्यास, निर्णयक्षमता विकसित करण्यास आणि भविष्यातील आव्हानांना आत्मविश्वासाने सामोरे जाण्यास सक्षम बनवत आहे. आज अस्त्र हा कदमवाकवस्ती (ता. हवेली) येथील MIT मध्ये नवविचार, सर्जनशीलता आणि युवा शक्तीचे प्रभावी प्रतीक ठरत आहे.
Editer sunil thorat
