अनैतिक संबंधास अडसर ठरत असल्याने पत्नीने आपल्या प्रियकराच्या मदतीने पतीचा खून…

पुणे (हवेली) : दोघांच्या अनैतिक संबंधास अडसर ठरत असल्याने पत्नीने आपल्या प्रियकराच्या मदतीने पतीचा खून केल्याची धक्कादायक घटना लोणी काळभोर ग्रामपंचायत हद्दीतील रायवाडी रस्त्यावरील वडाळे वस्ती परिसरात घडली आहे.

अवघ्या तीन तासांच्या आत या गुन्ह्याची उकल करून लोणी काळभोर पोलिसांनी दोन्ही आरोपींना जेरबंद करण्यात यश मिळवले आहे. रवींद्र काशिनाथ काळभोर (वय ४५, रा. वडाळे वस्ती, टाकेचा माळ, रायवाडी रोड, लोणी काळभोर) असे मृत्यू झालेल्या शेतकऱ्याचे नाव आहे. तर त्याचा खुन केल्या प्रकरणी मयताची पत्नी शोभा रविंद्र काळभोर (वय ४२) व तिचा प्रियकर गोरख त्र्यंबक काळभोर (वय ४१, रा. लोणी काळभोर, ता. हवेली) यांना अटक करण्यात आली आहे.

याप्रकरणी रवींद्र यांचे भाऊ भाऊसाहेब काशिनाथ काळभोर (वय ४८, रा. कदमवाकवस्ती, ता. हवेली) यांनी फिर्याद दिली आहे. पोलीस सुत्रांनी दिलेल्या माहितीनुसार, रवींद्र व शोभा काळभोर हे नात्याने पती पत्नी असून त्यांना एक मुलगा व एक मुलगी आहे. रवींद्र हे शेती करून कुटुंबाचा उदरनिर्वाह करत होते. त्यांना मद्याचे व्यसन होते. मंगळवारी (१ एप्रिल) रोजी सकाळी रवींद्र काळभोर हे घराच्या बाहेरील पलंगावर रक्ताच्या थारोळ्यात जखमी व बेशुध्द अवस्थेत आढळून आले.

घटनेची माहिती मिळताच, लोणी काळभोर पोलीस तातडीने घटनास्थळी दाखल झाले. व रवींद्र काळभोर यांना उपचारासाठी लोणी काळभोर येथील प्राथमिक आरोग्य केंद्रात दाखल केले. तेथील डॉक्टरांनी रवींद्र यांचा उपचारापूर्वीच मृत्यू झाल्याचे घोषित केले. त्यांचा कोणीतरी खुन केला असावा. असा पोलिसांचा प्राथमिक अंदाज होता. लोणी काळभोर पोलिसांनी तपासाला सुरवात केली असता त्यांन शोभा यांचे गोरख याचेशी अनैतीक संबंध असल्याची माहिती मिळाली. मिळालेल्या माहितीच्या आधारे दोघांना ताब्यात घेऊन अधिक चौकशी केली असता, अनैतीक संबंधात अडसर होत असल्याने रवींद्र काळभोर यांचा कायमचा काटा काढायचा आरोपींनी कट रचला होता अशी माहिती मिळाली.

सोमवार (३१ मार्च) रोजी रात्री अकरा वाजण्याच्या सुमारांस रवींद्र काळभोर हे घराबाहेर पलंगावर झोपलेले असताना, दोघांनी संगनमत करून त्यांच्या डोक्यात फावड्याने वार करून खून केला. अशी कबुली दोन्ही आरोपींनी पोलिसांना दिली आहे. याप्रकरणी गुन्हा दाखल करून दोन्ही आरोपींना अटक केली आहे. या गुन्हयाचा प्रकार हा अतिशय गुंतागुंतीचा व क्लिष्ठ स्वरुपाचा असताना देखील अवघ्या ३ तासांचे आतमध्ये आरोपी निष्पन्न करुन, लोणी काळभोर पोलीसांनी सदरचा गुन्हा उघडकीस आणला आहे.

सदरची कामगीरी पोलीस उप आयुक्त डॉ. राजकुमार शिंदे, सहाय्यक पोलीस आयुक्त अनुराधा उदमले यांच्या मार्गदर्शनाखाली लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे, पोलीस उप निरीक्षक अनिल जाधव, उदय काळभोर, सर्जेराव बोबडे, रत्नदिप बिराजदार, दिगंबर सोनटक्के, पुजा माळी, संभाजी देवीकर, विलास शिंदे, रामहरी वणवे, नागलोत, रामदास मेमाणे, रवी आहेर, बाजीराव विर, चक्रधर शिरगीरे, राहुल कर्डीले, प्रदीप गाडे, सुरज कुंभार, सचिन सोनवणे, विशाल बनकर, शिवाजी दरेकर, अजिंक्य जोजारे, संदीप धुमाळ, महिला पोलीस ज्योती नवले, उषा थोरात यांच्या पथकाने केली आहे.