सावकारीचा हैदोस! पावणेसात लाखांच्या बदल्यात १२.२० लाख उकळले; पत्नीचा विनयभंग, जीवे मारण्याची धमकी – लोणी काळभोरमध्ये गुन्हा दाखल…
तुळशीराम घुसाळकर
लोणी काळभोर (ता. हवेली) : पावणेसात लाख रुपयांचे कर्ज देऊन तब्बल १० ते ७० टक्के दराने अवाजवी व्याज आकारत ऑनलाईन व रोख स्वरुपात १२ लाख २० हजार रुपये उकळूनही आणखी रकमेची मागणी करणाऱ्या सावकार व त्याच्या साथीदारांविरोधात लोणी काळभोर पोलीस ठाण्यात गंभीर स्वरूपाचा गुन्हा दाखल करण्यात आला आहे.
या प्रकरणी दत्तात्रय आनंदा पवार (वय ४३, रा. राहींजवस्ती, लोणी काळभोर) यांनी दिलेल्या फिर्यादीवरून सावकार शाम वामन सावंत व त्याच्या २ ते ४ साथीदारांविरोधात गुन्हा नोंदवण्यात आला आहे. हा प्रकार सन २०१९ ते २०२५ या कालावधीत लोणी काळभोर ग्रामपंचायत हद्दीतील राहींजवस्ती परिसरात घडल्याचे पोलिस तपासात उघड झाले आहे.
वरिष्ठ पोलीस निरीक्षक राजेंद्र पन्हाळे यांनी दिलेल्या माहितीनुसार, फिर्यादी यांनी आर्थिक अडचणीमुळे ६ लाख ५९ हजार ३७५ रुपये कर्ज घेतले होते. मात्र सावकाराने १० ते ७० टक्क्यांपर्यंत अवाजवी व्याज आकारत फिर्यादी व त्यांच्या पत्नीकडून ऑनलाईन व रोख स्वरूपात एकूण १२ लाख २० हजार रुपये वसूल केले.
इतके पैसे घेतल्यानंतरही सावकार शाम सावंत याने आणखी ४ लाख रुपये मुद्दल बाकी असल्याचे सांगत फिर्यादीच्या पत्नीच्या मैत्रीणीची राहींजवस्ती येथील गट नंबर ४७ मधील १ गुंठा जमीन साठेखत करून घेतली. या साठेखतामध्ये ५ लाख रुपये दिल्याचे खोटे नमूद करण्यात आले असून, आता त्या जमिनीचा ताबा घेण्यासाठी दबाव टाकला जात आहे.
ताबा नको असल्यास साडेचार लाख रुपयांची खंडणी मागितली जात असून, रक्कम देणे अशक्य झाल्याने सावकाराने फिर्यादीच्या पत्नीला “तु आणि तुझी मुलगी धंद्यावर बस, धंदा करून पैसे फेड” असे अश्लील व अपमानास्पद शब्दांत बोलून तिचा विनयभंग केला. तसेच फिर्यादीला “पोलीसांत तक्रार केलीस तर तुला जीपला बांधून लोणी गावात वरात काढतो” अशी जीवघेणी धमकी दिल्याचे फिर्यादीत नमूद आहे.
या सततच्या छळाला कंटाळून अखेर पवार यांनी पोलिसांकडे धाव घेतली असून, सावकार व त्याच्या साथीदारांविरोधात अवैध सावकारी, आर्थिक फसवणूक, विनयभंग व धमकी या गंभीर कलमान्वये गुन्हा दाखल करण्यात आला आहे. या प्रकरणाचा पुढील तपास सहाय्यक पोलीस निरीक्षक कृष्णा बाबर हे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली करत आहेत.
Editer sunil thorat
