राजर्षी शाहू वाणिज्य व विज्ञान महाविद्यालय येथे वार्षिक स्नेहसंमेलन उत्साहात…
हडपसर (पुणे) : जेएसपीएम संचलित जयवंत शिक्षण प्रसारक मंडळ (JSPM) अंतर्गत कार्यरत राजर्षी शाहू वाणिज्य व विज्ञान महाविद्यालयाच्या (संगणक शास्त्र विभाग) वार्षिक स्नेहसंमेलनाचा सोहळा उत्साहात व दिमाखात पार पडला. संस्थेचे संस्थापक सचिव डॉ. तानाजी सावंत यांच्या मार्गदर्शनाखाली कार्यक्रमाचे आयोजन करण्यात आले.
स्नेहसंमेलनाचे उद्घाटन व पारितोषिक वितरण समारंभ डॉ. राजकुमार शिंदे (डीसीपी, परिमंडळ-६, पुणे) यांच्या हस्ते झाले. कार्यक्रमाची सुरुवात सरस्वती पूजनाने करण्यात आली.
प्राचार्य डॉ. प्रशांत माने-देशमुख यांनी प्रास्ताविकात महाविद्यालयात राबविण्यात येणाऱ्या विविध शैक्षणिक, सांस्कृतिक व कौशल्यविकास उपक्रमांची माहिती दिली. विद्यार्थ्यांनी सर्वांगीण विकासासाठी शिक्षणाबरोबरच विविध उपक्रमांमध्ये सक्रिय सहभाग नोंदवावा, असे आवाहन त्यांनी केले.
प्रमुख पाहुणे डॉ. राजकुमार शिंदे यांनी विद्यार्थ्यांना स्वयंशिस्त, आत्मविश्वास आणि सकारात्मक संगतीचे महत्त्व पटवून दिले. “संगत गुण ओळख निर्माण करतो,” असे सांगत त्यांनी सोशल मीडियाचा मर्यादित व सुजाण वापर करण्याचा सल्ला दिला. सायबर व सोशल गुन्हेगारीपासून दूर राहण्याचे आवाहन करत समाजात वावरताना इतरांना त्रास होणार नाही याची जाणीव ठेवावी, तसेच वाहतूक नियमांचे काटेकोर पालन करावे, असेही त्यांनी नमूद केले. महाविद्यालय व परिसर व्यसनमुक्त ठेवण्याचा निर्धार विद्यार्थ्यांनी करावा, असेही त्यांनी सांगितले.
या प्रसंगी गुणवंत विद्यार्थ्यांचा मान्यवरांच्या हस्ते सत्कार करण्यात आला. कार्यक्रमाला जेएसपीएमचे उपाध्यक्ष डॉ. गिरीराज सावंत, डॉ. वसंत बुगडे, डॉ. मारुती काळबांडे, सिनियर पोलीस इन्स्पेक्टर अमोल मोरे, मानसिंग पाटील तसेच महाविद्यालयातील सर्व शिक्षक, शिक्षकेतर कर्मचारी व विद्यार्थी मोठ्या संख्येने उपस्थित होते.
कार्यक्रमाचे नियोजन प्रा. सारिका सुरवसे यांनी केले, तर सूत्रसंचालन विद्यार्थी अंशुम रामानंदी यांनी केले. स्नेहसंमेलन विविध सांस्कृतिक कार्यक्रमांनी रंगतदार झाले. विद्यार्थ्यांनी सादर केलेल्या नृत्य, नाट्य, संगीत व लघुनाटिका यांना उपस्थितांचा उत्स्फूर्त प्रतिसाद मिळाला.
Editer sunil thorat
