कदमवाकवस्ती परिसरात पुन्हा अपघात ; पादचारी सुरक्षेचा प्रश्न ऐरणीवर…

कदमवाकवस्ती परिसरात डंपरची धडक ; रस्त्यावर चालत असलेला तरुण गंभीर जखमी...

कदमवाकवस्ती (ता. हवेली) : पुणे–सोलापूर महामार्गावर मंगळवारी (दि.7) सकाळी सव्वा आठ वाजण्याच्या सुमारास भरधाव डंपरने पायी चाललेल्या तरुणाला जोरदार धडक दिल्याने तो गंभीर जखमी झाला. हा अपघात कदमवाकवस्ती हद्दीतील एचपी डेपो गेटसमोर घडला. जखमी तरुणाचे नाव जसवंत चौधरी (पूर्ण नाव व पत्ता अज्ञात) असे असून तो राजस्थानचा रहिवासी असल्याची माहिती पोलिसांकडून मिळाली आहे. चौधरी हा कदमवाकवस्ती परिसरात एका कंपनीत काम करत होता. नेहमीप्रमाणे कामावर जात असताना महामार्ग ओलांडताना भरधाव वेगातील डंपरने त्याला उडवले. या धडकेत तो गंभीर जखमी झाला असून सध्या त्याच्यावर लोणी काळभोर येथील खासगी रुग्णालयात उपचार सुरू आहेत. त्याची प्रकृती चिंताजनक असल्याचे समजते.

अपघातानंतर घटनास्थळी उपस्थित नागरिकांनी तात्काळ मदत करून जखमीला रुग्णालयात दाखल केले. वाहतूक पोलिसांनी राजस्थानमधील त्याच्या नातेवाईकांना अपघाताबाबत कळवले असून डंपर आणि चालकाला लोणी काळभोर पोलिसांनी ताब्यात घेतले आहे. या घटनेमुळे काही वेळ महामार्गावर वाहतूक कोंडी निर्माण झाली होती. लोणी काळभोर पोलीस ठाण्याचे कर्मचारी आणि वाहतूक विभागाचे अधिकारी घटनास्थळी दाखल होऊन डंपर बाजूला करून वाहतूक सुरळीत केली.