हडपसर (पुणे) : (दि.११ मार्च २०२६) आंतरराष्ट्रीय महिला दिनानिमित्त एस. एम. जोशी कॉलेजच्या महिला सबलीकरण कक्षाच्या वतीने विशेष व्याख्यानाचे आयोजन करण्यात आले. हा कार्यक्रम महाविद्यालयाचे प्राचार्य प्रा. (डॉ.) एकनाथ मुंढे यांच्या मार्गदर्शनाखाली पार पडला. कार्यक्रमासाठी लेखापरीक्षा संचालनालय, नवी मुंबई येथील सहसंचालक नंदा चिंधे या प्रमुख पाहुण्या म्हणून उपस्थित होत्या, तर अध्यक्षस्थानी उपप्राचार्य प्रा. (डॉ.) किशोर काकडे होते.
प्रमुख पाहुण्या नंदा चिंधे यांनी मार्गदर्शन करताना महिलांनी व मुलींनी आर्थिक व्यवहारांमध्ये पुढाकार घेऊन आर्थिक साक्षरतेकडे लक्ष देणे गरजेचे असल्याचे सांगितले. अनेक महिला “आपण कुठे कमावतो?” या विचारामुळे आर्थिक व्यवहारांपासून दूर राहतात. मात्र हा दृष्टिकोन बदलून महिलांनी आर्थिक साक्षरता आत्मसात करणे आणि कमाईचे योग्य नियोजन करणे आवश्यक असल्याचे त्यांनी स्पष्ट केले. याचबरोबर महिलांनी आपल्या आरोग्याकडेही विशेष लक्ष दिले पाहिजे, असा संदेश त्यांनी दिला.
अध्यक्षीय मनोगत व्यक्त करताना प्रा. (डॉ.) किशोर काकडे यांनी भारतीय समाजातील वाईट चाली-रुढी बंद करण्यासाठी अनेक समाजसुधारकांनी केलेल्या कार्याची आठवण करून दिली. स्त्री चळवळीतून महिलांना मिळालेल्या हक्कांविषयीही त्यांनी मार्गदर्शन केले.
यावेळी महाविद्यालयातील सर्व महिला प्राध्यापकांचा गुलाबपुष्प व पेन देऊन सत्कार करण्यात आला. कार्यक्रमाचे प्रास्ताविक व पाहुण्यांचा परिचय समितीच्या चेअरमन डॉ. निशा गोसावी यांनी करून दिला. सूत्रसंचालन डॉ. छाया सकटे यांनी केले, तर आभार प्रदर्शन डॉ. ज्योती किरवे यांनी केले. या कार्यक्रमाला उपप्राचार्य डॉ. संजय जगताप, प्रा. (डॉ.) रंजना जाधव, डॉ. संगीता यादव तसेच महाविद्यालयातील सर्व महिला प्राध्यापिका उपस्थित होत्या.
Editer sunil thorat
