फुरसुंगी (हडपसर) : पुणे शहरातील सराईत गुन्हेगारांना बेकायदेशीररीत्या गावठी बनावटीची पिस्टले व जिवंत काडतुसे पुरविणाऱ्या टोळीचा फुरसुंगी पोलीस स्टेशन पोलिसांनी पर्दाफाश करत मुख्य सूत्रधारासह अनेक आरोपींना अटक केली आहे. या कारवाईमुळे पुणे शहरात बेकायदेशीर शस्त्रपुरवठा साखळीला मोठा धक्का बसला आहे.
वरिष्ठ पोलीस निरीक्षक अमोल मोरे यांनी दिलेल्या माहितीनुसार, दि. १ ऑक्टोबर २०२५ रोजी सायंकाळी साडेसातच्या सुमारास मंतरवाडी फाटा, फुरसुंगी येथे आरोपी अमर हनुमंत गाडे (रा. खराडी, पुणे) याला १ गावठी बनावटीचे पिस्टल, मॅगझीन व ३ जिवंत काडतुसे विनापरवाना बाळगताना ताब्यात घेण्यात आले. त्याच्यासोबत तडीपार आरोपी गोपाळ संजय यादव (रा. शिरूर, जि. पुणे) हाही मिळून आल्याने त्यालाही अटक करण्यात आली.
तपासादरम्यान सनी संजय यादव याने पिस्टल खरेदीसाठी रोख रक्कम पुरविल्याचे तसेच निशांत भगवान भगत हा आरोपींसोबत मध्यप्रदेश येथे जाऊन शस्त्र खरेदीत सहभागी झाल्याचे निष्पन्न झाले. त्यानुसार दि. २ ऑक्टोबर रोजी गुन्हा दाखल करण्यात आला.
पुढील तपासात सचिन ऊर्फ पप्पू दत्तात्रय घोलप (रा. धनकवडी, पुणे) याने गावठी पिस्टल खरेदीसाठी सांगितल्याचे उघड झाले. आरोपींनी मध्यप्रदेश राज्यातील धुळे जिल्ह्यातील शिरपूर तालुक्यातील लाकडी हनुमान गाव येथून सनीसिंग ऊर्फ बच्चनसिंग ऊर्फ सनीभाई दिवानसिंग चावला (रा. उमरठी, ता. वरला, जि. बरवानी, मध्यप्रदेश) याच्याकडून पिस्टल, मॅगझीन व जिवंत काडतुसे घेतल्याचे तपासात स्पष्ट झाले.
पोलिसांनी मध्यप्रदेशमधील वरला पोलीस स्टेशनच्या मदतीने शोधमोहीम राबवली. दरम्यान संबंधित आरोपी हा पुण्यातील विविध गुन्ह्यांमध्ये अटकेत असून सध्या येरवडा कारागृह येथे असल्याची माहिती मिळाली. न्यायालयीन आदेशानंतर त्याला ताब्यात घेऊन अटक करण्यात आली.
चौकशीत सनीसिंग याने उमरठी (मध्यप्रदेश) येथील क्रेझीमॉन्टी ऊर्फ जयबीरसिंग प्रकाशसिंग चावला, गुरुचरणसिंग आवसिंग बर्नाला, परविनसिंग उत्तमसिंग टकराना, राजपालसिंग प्रधानसिंग जुनेजा, अलोकसिंग जोहरसिंग बर्नाला आणि नानकसिंग अजितसिंग बर्नाला यांच्या मदतीने गावठी पिस्टल तयार करून वेगवेगळ्या गुन्हेगारांना विक्री करत असल्याची कबुली दिली. संबंधित आरोपींनाही न्यायालयीन आदेशानंतर येरवडा कारागृहातून ताब्यात घेण्यात आले असून त्यांचा गुन्ह्यातील सहभाग निष्पन्न झाला आहे.
ही कारवाई पोलीस उपायुक्त, परिमंडळ ६ डॉ. राजकुमार शिंदे यांच्या मार्गदर्शनाखाली तसेच सहाय्यक पोलीस आयुक्त अनुराधा उदमले यांच्या सूचनेनुसार वरिष्ठ पोलीस निरीक्षक अमोल मोरे यांच्या नेतृत्वाखाली करण्यात आली. पोलीस उपनिरीक्षक महेश नलवडे, विनोद पवार, सहाय्यक पोलीस फौजदार सिध्देश्वर पळसे, पोलीस हवालदार सतीश काळे, हरिदास कदम, श्रीनाथ जाधव व गणेश शिंदे यांनी या कारवाईत सहभाग घेतला.
या धडक कारवाईमुळे पुणे शहरातील बेकायदेशीर शस्त्रविक्रीच्या जाळ्याला मोठा आळा बसला असून पुढील तपास सुरू आहे.
Editer sunil thorat
