कदमवाकवस्ती (ता. हवेली) : हिंदवी स्वराज्याचे संस्थापक छत्रपती शिवाजी महाराज यांच्या जयंतीनिमित्त ग्रामपंचायत कदमवाकवस्ती व बुधराणी हॉस्पिटल, पुणे यांच्या संयुक्त विद्यमाने भव्य मोफत नेत्र तपासणी व मोतीबिंदू शस्त्रक्रिया शिबिराचे आयोजन करण्यात आले. गुरुवार दि. १९ फेब्रुवारी २०२६ रोजी सकाळी ९.३० वाजता कार्यक्रम उत्साहात पार पडला.
या शिबिरात डोळ्यांची मोफत तपासणी, गरजूंना मोफत मोतीबिंदू शस्त्रक्रिया तसेच अल्पदरात चष्मे वाटप करण्यात आले. ग्रामस्थांनी मोठ्या संख्येने उपस्थित राहून या सामाजिक उपक्रमाला उत्स्फूर्त प्रतिसाद दिला. विशेषतः ज्येष्ठ नागरिकांनी मोतीबिंदू तपासणी व शस्त्रक्रियेसाठी नावनोंदणी करून मोठ्या संख्येने लाभ घेतला. अल्पदरात चष्मे उपलब्ध करून दिल्याने सर्वसामान्य नागरिकांना मोठा दिलासा मिळाला.
कार्यक्रमाच्या उद्घाटनप्रसंगी माजी सरपंच चित्तरंजन गायकवाड, माजी सरपंच गौरी गायकवाड, उपसरपंच नासिर पठाण, पोलीस उपनिरीक्षक उदय काळभोर, जयप्रकाश नाना कदम, दीपक काळभोर, सतीश काळभोर, शब्बीर पठाण, प्रकाश गायकवाड, बापूराजे गायकवाड, अतुल कदम, घाटे गुरुजी आदी मान्यवर उपस्थित होते. मान्यवरांच्या हस्ते दीपप्रज्वलन करून कार्यक्रमाचे उद्घाटन करण्यात आले.
सामाजिक बांधिलकी जपत राबविण्यात आलेल्या या उपक्रमामुळे अनेक गरजू नागरिकांना थेट आरोग्य लाभ मिळाला असून ग्रामपंचायत कदमवाकवस्ती व बुधराणी हॉस्पिटल यांच्या संयुक्त प्रयत्नांचे सर्वत्र कौतुक होत आहे. शिवजयंतीनिमित्त आयोजित हे शिबिर ग्रामस्थांसाठी खऱ्या अर्थाने आरोग्यदायी ठरले.
Editer sunil thorat
