कचरा प्रश्न चिघळला ; एमआयटीवर अतिक्रमणाचे आरोप, ग्रामस्थ आक्रमक – प्रशांत काळभोर यांचा कडक इशारा…

लोणी-काळभोर (ता. हवेली) : मुळा-मुठा नदीपात्रात कचरा टाकण्याच्या प्रश्नावरून सुरू असलेला वाद आता अधिकच तीव्र झाला असून लोणी-काळभोर ग्रामपंचायत, ग्रामस्थ आणि एमआयटी प्रशासन यांच्यातील संघर्ष उघडपणे समोर आला आहे. विद्यार्थ्यांच्या आंदोलनामुळे गावांमध्ये कचरा साचून नागरिकांच्या आरोग्यावर गंभीर परिणाम होत असल्याने ग्रामस्थांनी तीव्र नाराजी व्यक्त केली आहे.

गेल्या अनेक वर्षांपासून कचरा व्यवस्थापनाचा प्रश्न प्रलंबित असताना अचानक विद्यार्थ्यांनी ‘कचरा बंद’ आंदोलन छेडत कचरा वाहतुकीला अडथळा निर्माण केला. परिणामी, लोणी-काळभोर व परिसरात ठिकठिकाणी कचऱ्याचे ढीग साचले असून दुर्गंधी व अस्वच्छतेमुळे नागरिक त्रस्त झाले आहेत. ग्रामस्थांच्या मते, हा प्रश्न सोडवण्याऐवजी आंदोलनामुळे परिस्थिती अधिकच बिकट झाली आहे.

दरम्यान, कृषी उत्पन्न बाजार समितीचे संचालक प्रशांत काळभोर यांनी एमआयटी प्रशासनावर गंभीर आरोप करत आंदोलनामागे संस्थेचा हात असल्याचा दावा केला. “एमआयटी प्रशासनाने विद्यार्थ्यांना पुढे करून आंदोलन उभे केले आहे. विद्यार्थ्यांवर गुन्हे दाखल होऊ नयेत म्हणून ग्रामस्थांनी संयम राखला आहे,” असे ते म्हणाले. तसेच, “एमआयटी संस्थेकडे स्वतःचा कचरा प्रकल्प नाही. रात्रीच्या वेळी ट्रॅक्टरद्वारे कचरा थेट नदीपात्रात टाकला जातो,” असा गंभीर आरोपही त्यांनी केला.

अतिक्रमणाच्या मुद्द्यावर बोलताना प्रशांत काळभोर यांनी सांगितले की, “एमआयटीने ओढ्यावर अतिक्रमण करत थेऊर-लोणी काळभोर मार्गावरील रस्त्याचे क्षेत्र हडप केले आहे. नकाशात रस्ता दाखवला असला तरी प्रत्यक्षात तो अस्तित्वात नाही. गट क्रमांक ३९ व ११३ मधील रस्त्यांवर अतिक्रमण करून नागरिकांच्या हक्कांवर गदा आणली जात आहे. ”ग्रामस्थांनीही याबाबत तीव्र भूमिका घेत गावाचा नदीपात्राकडे जाणारा पारंपरिक रस्ता गायब झाल्याचा आरोप केला. “गाव आधीपासून आहे, संस्था नंतर आली. त्यामुळे गावाच्या हक्काच्या रस्त्यावर अडथळे निर्माण करणे अन्यायकारक आहे,” अशी प्रतिक्रिया स्थानिक नागरिकांनी दिली.

याच पार्श्वभूमीवर लोणी-काळभोर ग्रामपंचायतीने गट क्रमांक ११३ ही जागा कचरा व्यवस्थापन प्रकल्पासाठी देण्याची मागणी प्रशासनाकडे केली आहे. त्या ठिकाणी कचऱ्याचे वर्गीकरण व विल्हेवाट लावण्यासाठी प्रकल्प उभारण्याचा ग्रामपंचायतीचा मानस असून यामुळे दीर्घकालीन तोडगा निघू शकतो, असे मत व्यक्त केले जात आहे.

प्रशासनाकडे करण्यात आलेल्या मागण्यांमध्ये गट क्रमांक ११३ ची तातडीने मोजणी करून ती जागा ग्रामपंचायतीकडे हस्तांतरित करणे, गट क्रमांक ३९ मधील रस्ता तात्काळ खुला करणे आणि पर्यायी रस्त्याची व्यवस्था करणे यांचा समावेश आहे. या संदर्भात प्रांत अधिकारी माने यांनी पर्यायी मार्ग उपलब्ध करून देण्याचे आश्वासन दिल्याची माहितीही यावेळी देण्यात आली.

बाजार समितीचे संचालक प्रशांत काळभोर यांची प्रतिक्रिया…

“कचऱ्यामुळे गावात राहणे कठीण झाले आहे. लहान मुलं आणि ज्येष्ठ नागरिकांच्या आरोग्याचा प्रश्न निर्माण झाला आहे.” “आंदोलनामुळे कचरा उचलणे बंद झाले, पण पर्यायी व्यवस्था नाही. याचा त्रास आम्हालाच सहन करावा लागतो.” “रस्ते अडवून आणि अतिक्रमण करून गावकऱ्यांचे हक्क हिरावले जात आहेत. प्रशासनाने तात्काळ हस्तक्षेप करावा.” दरम्यान, एमआयटीने ज्या-ज्या ठिकाणी अतिक्रमण केले आहे ते तात्काळ हटवावे, अन्यथा ग्रामस्थ सनदशीर मार्गाने तीव्र आंदोलन छेडतील, असा इशारा देण्यात आला आहे.

आंदोलनादरम्यान कोणतीही अनुचित घटना घडल्यास त्याची संपूर्ण जबाबदारी प्रशासनाची राहील, असा कडक इशारा प्रशांत काळभोर यांच्या सह ग्रामस्थांनी दिला.

एकूणच, कचरा प्रश्नासोबतच अतिक्रमणाचा मुद्दा चिघळल्याने लोणी-काळभोर परिसरात तणावाचे वातावरण निर्माण झाले असून प्रशासनाने तातडीने ठोस निर्णय घेण्याची गरज समाजातून व्यक्त होत आहे.

Editer sunil thorat