जेजुरी खंडोबा मंदिरात दर्शनावेळी देणगीसाठी जबरदस्ती? भाविकाची तक्रार

जेजुरी (पुणे) : खंडोबा मंदिर जेजुरी येथे दर्शनासाठी आलेल्या भाविकाने मंदिरातील देणगी व्यवस्थापनावर गंभीर प्रश्नचिन्ह उपस्थित केले आहे. सिताराम बवले हे 21 मार्च रोजी आपल्या कुटुंबासह खंडोबा दर्शनासाठी आले असता, गाभाऱ्यातील कथित गैरप्रकारामुळे त्यांनी थेट देवस्थान प्रशासनाला तक्रार दाखल केली आहे.

बवले यांनी दिलेल्या माहितीनुसार, दर्शन घेतल्यानंतर गाभाऱ्यात दोन पुजारी निर्जीव घोड्यासह बसले होते. या ठिकाणी त्यांनी देणगी म्हणून ५०० रुपयांची मागणी केली. धार्मिक भावना जपून त्यांनी रक्कम दिली; मात्र त्याबदल्यात अधिकृत पावती देण्यास पुजाऱ्यांनी नकार दिला. “आम्ही पावती देत नाही,” असे स्पष्ट उत्तर देण्यात आल्याचा आरोप बवले यांनी केला आहे.

यावेळी त्या निर्जीव घोड्याजवळ मोठ्या प्रमाणात रोख रक्कम—विशेषतः ५०० रुपयांच्या नोटांचा साठा—दिसून आला. हा प्रकार अधिकृत दानपेटीऐवजी थेट रोख व्यवहार केल्याचे दर्शवत असल्याने, तो पूर्णपणे अनधिकृत असल्याचे बवले यांचे मत आहे.

या घटनेनंतर बवले यांनी देवस्थान ट्रस्टला मेलद्वारे तक्रार नोंदवून, या प्रकाराची सखोल चौकशी करून लेखी खुलासा द्यावा, अशी मागणी केली आहे. “पुराव्यांसह संबंधित विभागाकडे तक्रार करण्याची वेळ येऊ नये, म्हणून देवस्थानाने तत्काळ भूमिका स्पष्ट करावी. अन्यथा ट्रस्टविरोधात पुढील कारवाई करण्यात येईल,” असा इशाराही त्यांनी दिला आहे.

दरम्यान, या संदर्भात मंगेश घोणे (विश्वस्त) यांच्याशी संपर्क साधला असता, त्यांनी भाविकाशी दूरध्वनीवर चर्चा झाल्याचे सांगितले. तसेच, अशा प्रकारच्या तक्रारी तात्काळ देवस्थान कार्यालयात लेखी स्वरूपात देणे आवश्यक असल्याचे त्यांनी नमूद केले. “घटनेची माहिती घेत आहोत. तपास करून योग्य ती माहिती दिली जाईल,” असे त्यांनी सांगितले.

मात्र, बवले यांनी विश्वस्तांवर आणखी गंभीर आरोप करताना सांगितले की, संभाषणादरम्यान या प्रकाराला एकप्रकारे ‘परंपरा’ म्हणून समर्थन देण्यात आले. “ही पद्धत शिवाजी महाराजांच्या काळापासून सुरू आहे,” असे सांगण्यात आल्याचा दावा त्यांनी केला. त्यामुळे हा प्रकार अधिकच गंभीर ठरत असून, ऐतिहासिक परंपरेच्या नावाखाली अनियमितता चालत असल्याचा संशय व्यक्त केला जात आहे.

बवले यांनी पुढे स्पष्ट केले की, मंदिरात देणगीसाठी अडवणूक करणे, भाविकांना दानपेटीत पैसे टाकू न देता थेट ताटात किंवा विशिष्ट ठिकाणी देण्यास भाग पाडणे, तसेच पावती न देणे हे सर्व प्रकार नियमबाह्य आहेत. “जर भाविकांना अशा प्रकारे त्रास दिला जात असेल, तर देवस्थानाचे पावित्र्य धोक्यात येते,” असे त्यांनी नमूद केले.

या पार्श्वभूमीवर त्यांनी देवस्थान विश्वस्तांच्या आर्थिक व्यवहारांची चौकशी करण्याची मागणी केली आहे. संबंधित प्रशासनाने याची दखल घेऊन निष्पक्ष तपास करावा, अन्यथा उच्च स्तरावर दाद मागण्याचा इशाराही त्यांनी दिला आहे.

सदर प्रकरणामुळे जेजुरी देवस्थानाच्या पारदर्शकतेबाबत प्रश्न निर्माण झाले असून, भाविकांमध्येही नाराजीचे वातावरण आहे. प्रशासन या प्रकरणात काय भूमिका घेते आणि प्रत्यक्षात चौकशी होते का, याकडे आता सर्वांचे लक्ष लागले आहे.

Editer sunil thorat