रात्रीच्या गस्तीत पोलिसांची कारवाई : घरफोडीच्या तयारीत असलेला एक जेरबंद, साथीदार फरार…

उरुळीकांचन (ता. हवेली, जि. पुणे) : रात्रीच्या गस्तीदरम्यान संशयास्पद हालचाली करत घरफोडीच्या तयारीत असलेल्या इसमावर उरुळीकांचन पोलिसांनी कारवाई करत एका आरोपीस ताब्यात घेतले असून त्याचा साथीदार अंधाराचा फायदा घेत पसार झाला आहे.

पोलीस कॉन्स्टेबल शरद भानुदास चव्हाण यांच्या फिर्यादीवरून मुंबई पोलीस कायदा कलम 122 नुसार गुन्हा दाखल करण्यात आला आहे. ही कारवाई 20 मार्च 2026 रोजी रात्री 11.00 ते 21 मार्च पहाटे 5.00 या वेळेत सुरू असलेल्या पेट्रोलिंगदरम्यान करण्यात आली.

पोलिसांनी दिलेल्या माहितीनुसार, उरुळीकांचन हद्दीत साखरे पेट्रोल पंपाजवळ, सदानंद बेकरीच्या पाठीमागे तुपेवस्ती रोडवर पहाटे सुमारे 3.00 वाजता दोन इसम संशयास्पद स्थितीत आढळून आले. त्यांनी चेहऱ्यावर काळे रुमाल बांधले होते आणि नंबर प्लेट नसलेल्या गोल्डन रंगाच्या अॅक्टिवावर दबा धरून बसले होते.

पोलिसांना पाहताच त्यांनी पळ काढण्याचा प्रयत्न केला. मात्र पोलिसांनी पाठलाग करून विशाल कैलास साबळे (वय 29, रा. तुपेवस्ती, उरुळीकांचन) याला ताब्यात घेतले. त्याचा साथीदार सनी अगरवाल हा अंधाराचा फायदा घेत पळून गेला.

ताब्यात घेतलेल्या आरोपीची झडती घेतली असता त्याच्याकडून लोखंडी कटावणी, धारदार स्क्रू ड्रायव्हर, काळा रुमाल तसेच नंबर प्लेट नसलेली अॅक्टिवा जप्त करण्यात आली. ही साधने घरफोडी किंवा चोरी करण्यासाठी वापरण्यात येतात, असा पोलिसांचा प्राथमिक अंदाज आहे.

या प्रकरणी उरुळीकांचन पोलीस ठाण्यात गुन्हा दाखल करण्यात आला असून पुढील तपास पोलीस हवालदार चोरमले करीत आहेत.