तुळशीराम घुसाळकर
लोणी काळभोर (ता. हवेली) : क्रांतीज्योती सावित्रीबाई फुले यांच्या १९५ व्या जयंतीनिमित्त समाजभूषण गणपतराव काळभोर महाविद्यालयात बालिका दिनाचे औचित्य साधून प्रेरणादायी कार्यक्रमाचे आयोजन करण्यात आले. या कार्यक्रमात सावित्रीबाई फुले यांच्या कार्याचा सखोल आढावा घेत त्यांच्या सामाजिक योगदानाचा गौरव करण्यात आला.
कार्यक्रमात मार्गदर्शन करताना डॉ. स्नेहा बुरगुल यांनी सांगितले की, अवघ्या ९ व्या वर्षी सावित्रीबाई फुले यांचा ज्योतिराव फुलें सोबत विवाह झाला. विवाहानंतर ज्योतिरावांनी त्यांना शिक्षणाची वाट दाखवली आणि त्यातूनच सावित्रीबाई देशातील पहिल्या महिला शिक्षिका ठरल्या. शिक्षणाच्या माध्यमातून समाजपरिवर्तन घडवून आणत त्यांनी बालविवाहास विरोध, विधवा विवाहाला प्रोत्साहन आणि अनाथ मुलांसाठी आश्रम सुरू करून समाजसुधारणेचे मोलाचे कार्य केले. १८९७ साली पुण्यात प्लेगची साथ असताना रुग्णांची सेवा करत असताना त्यांनी आपल्या प्राणांची आहुती दिली, हे त्यांचे समाजप्रती असलेले अपार समर्पण दर्शवते, असे प्रतिपादन त्यांनी केले.
यावेळी डॉ. बुलबुल यांनी उपस्थितांना मार्गदर्शन करत सावित्रीबाई फुले यांची जयंती संपूर्ण महाराष्ट्रात बालिका दिन म्हणून साजरी केली जाते, हे सांगत त्यांच्या विचारांची आजच्या काळात असलेली गरज अधोरेखित केली.
कार्यक्रमाची सुरुवात सावित्रीबाई फुले यांच्या प्रतिमापूजनाने झाली. हे पूजन प्राचार्य डॉ. अंबादास मंजुळकर यांच्या हस्ते करण्यात आले. अध्यक्षीय समारोप करताना प्राचार्य डॉ. अंबादास मंजुळकर म्हणाले की, ज्या काळात स्त्रियांनी शिक्षण घेणे पाप मानले जात होते, त्या काळात अंगावर शेण व दगड झेलत सावित्रीबाई फुले यांनी ज्ञानाची गंगा घराघरात पोहोचवली. शाळेत जाताना त्यांच्यावर होणाऱ्या अपमानाला न डगमगता त्यांनी आपल्या झोळीत दुसरी साडी ठेवून अध्यापनाचे कार्य अखंड सुरू ठेवले.
“एक मुलगा शिकला तर एक व्यक्ती शिकते, पण एक मुलगी शिकली तर संपूर्ण कुटुंब शिकते,” हा विचार प्रत्यक्षात आणण्याचे काम सावित्रीबाईंनी केले. आज स्त्रिया ग्रामपंचायत सरपंच पदापासून ते राष्ट्रपती, पंतप्रधान पदापर्यंत विविध क्षेत्रांत प्रगती करत आहेत, याचे श्रेय सावित्रीबाई फुले यांच्या कार्याला जाते, असे त्यांनी नमूद केले.
या कार्यक्रमाला महाविद्यालयातील सर्व प्राध्यापक बंधू-भगिनी तसेच शिक्षकेत्तर कर्मचारी बहुसंख्येने उपस्थित होते. कार्यक्रमाचे सूत्रसंचालन व आभारप्रदर्शन प्रा. डॉ. शिवाजी गायकवाड यांनी केले.
Editer sunil thorat
