पुणे (बारामती) : बारामती तालुक्यातील डोर्लेवाडी परिसरात श्री राम जन्मोत्सव उत्साहात साजरा करण्यात आला. अनेक ठिकाणी कीर्तन भजन,महाप्रसाद आदी विविध उपक्रम राबवण्यात आले. डोर्लेवाडी येथील संत सावता महाराज मंदिरामध्ये काल पासून (ता.५) अखंड २३ तासाचा श्री राम जय राम जय जय राम जप यज्ञ सुरू करण्यात आला होता.
सकाळी बाळासाहेब महाराज नाळे यांचे श्री राम जन्माचे कीर्तन झाले.दुपारी १२ वाजता मंदिरामध्ये पुष्पवृष्टी करण्यात आली. कीर्तनानंतर आरती व महाप्रसादाचे आयोजन करण्यात आले होते.
ब्रह्मचैतन्य जप संकुल व सांप्रदायिक भजनी मंडळाच्या वतीने या कार्यक्रमाचे आयोजन करण्यात आले होते.झारगडवाडी येथील हनुमान मंदिरात देखील येथील भजनी मंडळाने भजने सादर करून राम जन्मोत्सव साजरा केला.येथीलच नव्याने बांधण्यात आलेल्या श्री राम मंदिराचा कलशारोहण समारंभ उत्साहात पार पडला.
काल (ता.५) गावात कलशाची भव्य मिरवणूक काढण्यात आली. त्यानंतर रात्री सोमनाथ महाराज घोगरे शिंदेवाडी यांचे कीर्तन झाले.आज सकाळी मंदिरात विविध धार्मिक कार्यक्रम पार पडले. श्री राम जन्मानंतर महाप्रसादाचे आयोजन करण्यात आले होते.
