गुजरातमध्ये अमानुष कृत्य; पतीचा स्पर्म काउंट कमी असल्याने सासरा, नणंदेचा पती यांच्याकडून वारंवार बलात्कार, व्हिडिओ काढून ब्लॅकमेल
गुजरात (वडोदरा) : पतीचा स्पर्म काउंट कमी असल्याने ती गर्भवती रहावी, या कारणावरून सासरा, नणंदेचा पती आणि नात्यातील इतरांनी वारंवार बलात्कार केल्याचा धक्कादायक प्रकार उघडकीस आला आहे. ४० वर्षीय पीडित महिलेने पतीसह सासरकडील नातेवाईकांविरुद्ध नवपुरा पोलीस ठाण्यात बलात्कार, मारहाण, ब्लॅकमेल आणि धमकावण्याचे गंभीर आरोप करत गुन्हा दाखल केला आहे.
तक्रारीनुसार, पीडितेचे फेब्रुवारी २०२४ मध्ये लग्न झाले. काही आठवड्यांतच सासरच्या मंडळींनी तिच्या वयामुळे ती गर्भवती राहणार नाही अशी शक्यता व्यक्त केली आणि वैद्यकीय तपासणीचा सल्ला दिला. तपासणीत पतीचा स्पर्म काउंट अत्यंत कमी असल्याचे निदर्शनास आले. त्यानंतर महिलेने डॉक्टरांच्या सल्ल्यानुसार आयव्हीएफ उपचार घेतला, मात्र तो निष्फळ ठरला. पुढील उपचार नाकारून तिने बाळ दत्तक घेण्याची इच्छा व्यक्त केली, पण सासरकडून याला विरोध करण्यात आला.
जुलै २०२४ मध्ये महिला तिच्या खोलीत झोपलेली असताना सासरा आत घुसला आणि बळजबरीने शरीरसंबंध ठेवले. मदतीसाठी आरडाओरडा करताच तिला मारहाण करण्यात आली. हा प्रकार पतीला सांगितल्यावर त्याने “मला बाळ हवे आहे, तोंड बंद ठेव” असे सांगत नग्न फोटो आणि व्हिडिओ व्हायरल करण्याची धमकी दिली. त्यानंतर सासऱ्याने अनेक वेळा अत्याचार केला, मात्र ती गर्भवती राहिली नाही.
डिसेंबर २०२४ मध्ये नणंदेच्या पतीनेही तिच्यावर बलात्कार केला. जून २०२५ मध्ये ती गर्भवती राहिली, परंतु जुलै महिन्यात गर्भपात झाला. या काळात सासरकडील मंडळींनी सतत त्रास, धमक्या आणि ब्लॅकमेल सुरू ठेवले. शेवटी मानसिक व शारीरिक छळाला कंटाळून पीडितेने पोलिसात धाव घेतली.
सध्या पोलिसांनी गुन्हा दाखल करून सासरा, पती, नणंदेचा पती आणि इतर संशयितांविरुद्ध तपास सुरू केला आहे. या घटनेने वडोदरा तसेच संपूर्ण राज्यात संतापाची लाट उसळली आहे.
Editer sunil thorat
