पुणे : २९ जानेवारी २०२६ : यशस्वी एज्युकेशन सोसायटीच्या इंटरनॅशनल इन्स्टिट्यूट ऑफ मॅनेजमेंट सायन्स (आयआयएमएस), आयक्यूएसी विभाग व सावित्रीबाई फुले पुणे विद्यापीठाच्या पीएच.डी. रिसर्च सेंटर यांच्या संयुक्त विद्यमाने आयोजित करण्यात आलेली दोन दिवसीय संशोधन पद्धती कार्यशाळा मोठ्या उत्साहात आणि यशस्वीरित्या पार पडली.
या कार्यशाळेचे मध्यवर्ती सूत्र “प्रबंध लेखनासह डेटा विश्लेषण साधनांचे एकत्रीकरण” असे होते. संशोधन प्रक्रियेत सांख्यिकीय विश्लेषणाचे महत्त्व अधोरेखित करताना संशोधन प्रवासात कठोरता आणि नैतिक मूल्यांचे पालन करणे अत्यावश्यक असल्याचे मत आयआयएमएसचे संचालक डॉ. शिवाजी मुंढे यांनी प्रास्ताविकात व्यक्त केले. संशोधन क्षमता अधिक भक्कम करण्यावर या कार्यशाळेत विशेष भर देण्यात आला.
कार्यशाळेदरम्यान सांख्यिकीय साधनांच्या साहाय्याने डेटा विश्लेषण, साहित्य पुनरावलोकन, संदर्भ व उद्धरण व्यवस्थापनासाठी वापरल्या जाणाऱ्या आधुनिक टूल्सचा प्रभावी वापर, तसेच प्रबंध लेखन व संशोधन प्रकाशनांमध्ये विश्लेषणाचे एकत्रीकरण कसे करावे यावर सविस्तर मार्गदर्शन करण्यात आले.
भारती विद्यापीठाच्या आयटीसी विभागाचे संचालक प्रा. डॉ. सचिन कदम यांनी शैक्षणिक संशोधन, वास्तवातील अनुप्रयोग आणि उद्योग क्षेत्रातील संशोधनाचे महत्त्व स्पष्ट केले. संशोधक विद्यार्थ्यांनी वर्णनात्मक व अनुमानात्मक डेटा विश्लेषणाचे प्रत्यक्ष प्रशिक्षण घ्यावे, असे त्यांनी सांगितले. यासोबतच आर (R) सॉफ्टवेअरचा प्रभावी वापर, गृहीतक चाचणी व विश्लेषण या विषयांवर त्यांनी सखोल मार्गदर्शन केले.
कार्यशाळेच्या दुसऱ्या सत्रात प्रा. डॉ. आशुतोष झुंजूर यांनी “संशोधन प्रकरणाचा समारोप आणि प्रबंध तयारी” या विषयावर मार्गदर्शन केले. प्रबंध लेखनाची सुरुवात कशी करावी, निष्कर्ष प्रकरणाचा उद्देश काय असावा, तसेच मजबूत संशोधन चौकट कशी विकसित करावी यावर त्यांनी विविध उदाहरणांद्वारे सविस्तर माहिती दिली.
तसेच इंदिरा कॉलेज ऑफ इंजिनिअरिंग अँड मॅनेजमेंटच्या डॉ. दर्शना देसाई यांनी प्रभावी साहित्य समीक्षा या विषयावर मार्गदर्शन करताना विषय निवड, पद्धतशीर साहित्य पुनरावलोकन, उद्धरण व्यवस्थापन तसेच मेंडेली (Mendeley) संदर्भ व्यवस्थापन टूलचा शास्त्रशुद्ध वापर कसा करावा याची माहिती दिली.
कार्यशाळेत सहभागी झालेल्या सर्व संशोधक व विद्यार्थ्यांना प्रमाणपत्रांचे वितरण करण्यात आले. डॉ. वंदना मोहंती (आयक्यूएसी समन्वयक व प्रमुख – एमबीए), डॉ. अश्विनी ब्रह्मे (प्रमुख – एमसीए) यांच्या मार्गदर्शनाखाली आणि कार्यशाळा समन्वयक डॉ. सचिन मिसाळ यांच्या संयोजनात ही संशोधन पद्धती कार्यशाळा यशस्वीरित्या पूर्ण झाली.
Editer sunil thorat
