पुणे (इंदापूर) : जगद्गुरु संत श्रेष्ठ श्री तुकाराम महाराजांच्या पालखी सोहळ्यामध्ये राष्ट्रीय सहकारी साखर कारखाना महासंघाचे अध्यक्ष व माजी मंत्री हर्षवर्धन पाटील हे निमगाव केतकी येथून रविवारी (दि.२९) सकाळी पायी चालत सहभागी झाले.
बावडा येथील हर्षवर्धन पाटील यांच्या घराण्याला वारकरी संप्रदायाची अनेक पिढ्यांपासूनची मोठी परंपरा आहे. त्यामुळे हर्षवर्धन पाटील हे गेली २९ वर्षांपासून संत तुकाराम महाराज पालखी सोहळ्यामध्ये पायी चालत सहभागी होत आहेत.
पंढरीचा विठ्ठल हे साऱ्या विश्वाचे दैवत आहे, वारकरी परंपरा हे महाराष्ट्राचे वैभव आहे, पालखी सोहळ्यामध्ये पायी चालल्याने मिळणारा आनंद हा शब्दात व्यक्त करता येत नाही, त्यामुळे प्रत्येक वर्षी मी पालखी सोहळ्यामध्ये पायी चालत सहभागी होत असतो. पालखी सोहळे व वारकरी संप्रदाय हे महाराष्ट्राचे भूषण आहेत, असे हर्षवर्धन पाटील यांनी सांगितले. देहूचे संत तुकाराम महाराजांचे वंशज मोरे घराणे व बावड्याचे हर्षवर्धन पाटील यांचे घराणे यांचे अनेक शतकांपासून ऋणानुबंध आहेत. बावडा येथे रत्नाई निवासस्थानी हर्षवर्धन पाटील हे दरवर्षी संत तुकाराम महाराज पालखी सोहळा प्रमुखांचा व देहू संस्थांनच्या विश्वस्तांचा सन्मान करतात. दरम्यान, आज सोमवारी सकाळी पालखी सोहळा बावड्याकडे प्रस्थान केले.
संपादक डॉ गजानन टिंगरे
