लोणी काळभोर (ता. हवेली) : महाशिवरात्रीच्या निमित्ताने देवदर्शनासाठी घराबाहेर पडलेल्या १६ वर्षीय अल्पवयीन मुलीचे अज्ञात इसमाने फूस लावून अपहरण केल्याची धक्कादायक घटना उघडकीस आली आहे. ही घटना हवेली तालुक्यातील लोणी काळभोर परिसरात रविवारी (१५ फेब्रुवारी) सायंकाळी समोर आली असून, याप्रकरणी Loni Kalbhor Police Station येथे गुन्हा नोंदविण्यात आला आहे.
पोलीस सूत्रांनी दिलेल्या माहितीनुसार, संबंधित कुटुंब लोणी काळभोर परिसरात वास्तव्यास आहे. पीडित मुलीने सातवीपर्यंत शिक्षण घेतल्यानंतर शाळा सोडली होती. रविवारी महाशिवरात्रीच्या औचित्याने “मंदिरात जाऊन येते” असे सांगून ती घरातून बाहेर पडली; मात्र सायंकाळपर्यंत ती घरी परतली नाही.
मुलीच्या आई-वडिलांनी परिसरात तसेच नातेवाईक व मैत्रिणींकडे चौकशी करून शोध घेतला; परंतु तिचा कोणताही ठावठिकाणा लागला नाही. अखेर अज्ञात इसमाने कशाचेतरी आमिष दाखवून मुलीला पळवून नेल्याचा संशय व्यक्त करत वडिलांनी पोलीस ठाण्यात फिर्याद दाखल केली.
त्यानुसार पोलिसांनी अज्ञात इसमाविरोधात अपहरणाचा गुन्हा दाखल केला असून तपास सुरू केला आहे. पुढील तपास पोलीस निरीक्षक (गुन्हे) स्मिता पाटील यांच्या मार्गदर्शनाखाली सहाय्यक पोलीस निरीक्षक सोमनाथ नाळे करीत आहेत. पोलिसांनी नागरिकांना आवाहन केले आहे की, संबंधित मुलीबाबत कोणतीही माहिती मिळाल्यास तात्काळ लोणी काळभोर पोलीस ठाण्याशी संपर्क साधावा.
Editer sunil thorat
