सायबर फसवणुकीतील २.८६ लाखांची रक्कम हस्तगत ; लोणीकाळभोर पोलीस ठाण्याच्या सायबर पथकाची उल्लेखनीय कामगिरी…
लोणी काळभोर (ता. हवेली) : सायबर चोरट्यांकडून ऑनलाईन फसवणूक झालेली तब्बल २ लाख ८६ हजार ६८ रुपये यशस्वीरीत्या परत मिळवण्यात लोणी काळभोर पोलीस ठाण्याच्या सायबर पथकास मोठे यश मिळाले आहे.
नोव्हेंबर २०२५ मध्ये तक्रारदार महादेव महारुद्र कचरे (वय ५७, रा. कदमवाकवस्ती, लोणी काळभोर, ता. हवेली, जि. पुणे) यांनी जुना अशोक लेलँड टेम्पो खरेदी केला होता. या व्यवहारासाठी त्यांनी मन्नपुरम फायनान्स लिमिटेडकडून कर्ज घेतले होते. कर्जाच्या परतफेडीबाबत अज्ञात इसमाने ऑनलाईन संपर्क साधत कर्जाच्या रकमेवर काही टक्के सवलत देण्याचे आमिष दाखवून तक्रारदाराचा विश्वास संपादन केला.
त्यानंतर त्यांच्या बँक खात्यातील २,८६,०६८ रुपये अन्य बँक खात्यावर वर्ग करून सायबर फसवणूक करण्यात आली.
तक्रारदारांनी कर्जाची रक्कम जमा झाल्याची खात्री करण्यासाठी मन्नपुरम फायनान्स कार्यालयात चौकशी केली असता सदर रक्कम कर्ज खात्यावर जमा न झाल्याचे निदर्शनास आले. यावेळी आपली सायबर फसवणूक झाल्याची खात्री झाल्यानंतर त्यांनी लोणीकाळभोर पोलीस ठाण्यात तक्रार दाखल केली.
सदर प्रकरणाची गंभीर दखल घेत वरिष्ठ पोलीस निरीक्षक राजेंद्र पन्हाळे यांनी सायबर पथकाला तात्काळ तपासाचे आदेश दिले. आदेशानुसार सायबर पथकाने तांत्रिक विश्लेषण व ई-मेलद्वारे प्रभावी पाठपुरावा करत अल्पावधीत फसवणूक झालेली संपूर्ण रक्कम हस्तगत करून तक्रारदारास परत मिळवून दिली.
रक्कम परत मिळाल्याने तक्रारदारांनी लोणीकाळभोर पोलीस ठाणे व सायबर पथकाच्या कार्याचे मनापासून कौतुक करत आभार व्यक्त केले.
ही उल्लेखनीय कामगिरी मा. पोलीस आयुक्त, पुणे शहर अमितेश कुमार, अपर पोलीस आयुक्त (पूर्व विभाग) मनोज पाटील, पोलीस उप आयुक्त, परिमंडळ-०६ डॉ. राजकुमार शिंदे व सहाय्यक पोलीस आयुक्त, लोणीकाळभोर विभाग श्रीमती अनुराधा उदमले यांच्या मार्गदर्शनाखाली पार पडली.
या कारवाईत वरिष्ठ पोलीस निरीक्षक राजेंद्र पन्हाळे, पो.हवा. देवीकर, पो.अंमलदार बाजीराव वीर व उषा थोरात यांनी सहभाग घेतला.
Editer sunil thorat
