प्रलंबित शिक्षकभरती तात्काळ सुरू करण्यासाठी आज मुंबईत धरणे आंदोलन…
मुंबई : महाराष्ट्रातील प्रलंबित शिक्षकभरती तात्काळ सुरू करावी तसेच शिक्षण क्षेत्रातील विविध प्रलंबित प्रश्न मार्गी लावावेत या मागणीसाठी शिवयुनिटी फाउंडेशन, महाराष्ट्र राज्य यांच्या वतीने आज (दि. १० मार्च २०२६) मुंबई येथील आझाद मैदानावर पवित्र पोर्टल शिक्षकभरतीसंदर्भात धरणे आंदोलनाचे आयोजन करण्यात आले आहे.
सकाळी १० वाजता होणाऱ्या या आंदोलनात राज्यभरातील शिक्षक व शिक्षक पात्र उमेदवार मोठ्या संख्येने सहभागी होणार असल्याची माहिती आयोजकांनी दिली आहे.
राज्यात अनेक वर्षांपासून शिक्षकांच्या हजारो जागा रिक्त असून त्यामुळे विद्यार्थ्यांच्या शिक्षणावर परिणाम होत असल्याचा आरोप आंदोलनकर्त्यांनी केला आहे. पवित्र पोर्टलद्वारे शिक्षकभरती प्रक्रिया सुरू असली तरी ती अत्यंत संथ गतीने होत असल्याने पात्र उमेदवारांमध्ये नाराजी वाढत असल्याचेही संघटनेचे म्हणणे आहे. त्यामुळे ही भरती प्रक्रिया वेगाने राबवून सर्व रिक्त पदे तात्काळ भरावीत, अशी प्रमुख मागणी करण्यात आली आहे.
या आंदोलनातून RTE (मूलभूत शिक्षणाचा अधिकार कायदा) नुसार ९० टक्के शिक्षक पदभरती करावी, पवित्र पोर्टलमधील पसंदीक्रमाची अट रद्द करावी, तसेच राज्यातील सर्व विभागांतील रिक्त शिक्षक पदे तातडीने भरावीत, अशी मागणी करण्यात आली आहे. याशिवाय खाजगी अनुदानित शैक्षणिक संस्थांना देखील पवित्र पोर्टलद्वारेच भरती करणे बंधनकारक करावे, अशी मागणी संघटनेने केली आहे.
तसेच कला, क्रीडा आणि आयटी विषयांसाठी स्वतंत्र शिक्षक भरती सुरू करावी, कोकण विभागात राबविण्यात आलेला ‘कोकण पॅटर्न’ संपूर्ण राज्यभर लागू करावा आणि शिक्षण सेवकांचे मानधन वाढवावे, अशा विविध मागण्याही आंदोलनातून करण्यात येणार आहेत. शिक्षण क्षेत्रातील रिक्त पदे मोठ्या प्रमाणावर असल्यामुळे विद्यार्थ्यांच्या शैक्षणिक गुणवत्तेवर परिणाम होत असल्याचा दावा करत राज्य सरकारने तातडीने निर्णय घ्यावा, अन्यथा आंदोलन तीव्र करण्याचा इशारा देखील शिवयुनिटी फाउंडेशनच्या वतीने देण्यात आला आहे.
दरम्यान, या आंदोलनासाठी राज्यभरातील शिक्षक व शिक्षक पात्र उमेदवारांनी मोठ्या संख्येने उपस्थित राहून आपल्या हक्कासाठी आवाज उठवावा, असे आवाहन शिवयुनिटी फाउंडेशन, महाराष्ट्र राज्य यांच्या वतीने करण्यात आले आहे.
Editer sunil thorat
