घरेलू कामगारांच्या विविध मागण्यांसाठी मुंबईत आझाद मैदानावर आंदोलन; सामाजिक सुरक्षा व किमान वेतनाची मागणी…
पुणे / मुंबई : (दि. १० मार्च २०२६) महाराष्ट्र राज्य घरेलू कामगार समन्वय समिती संलग्न आनंद आधार घरेलू कामगार संघटना, पुणे यांच्या वतीने सुमारे शंभर घरेलू कामगार महिलांनी मुंबई येथील आझाद मैदानावर एकत्र येत विविध मागण्यांसाठी आंदोलन केले. घरेलू कामगारांना कायदेशीर हक्क, सामाजिक सुरक्षा व आर्थिक स्थैर्य मिळावे या उद्देशाने हे आंदोलन करण्यात आले.
महाराष्ट्रात हजारो महिला घरकाम करून आपला उदरनिर्वाह करत असल्या तरी त्यांना आजही अनेक मूलभूत हक्कांपासून वंचित राहावे लागत असल्याची खंत यावेळी व्यक्त करण्यात आली. घरेलू कामगारांसाठी ठोस कायदा, किमान वेतनाची हमी, सामाजिक सुरक्षा योजना आणि वृद्धापकाळात आर्थिक आधार देणारी पेन्शन योजना लागू करावी, या प्रमुख मागण्यांसाठी हे आंदोलन आयोजित करण्यात आले होते.
या आंदोलनात महाराष्ट्र राज्य घरेलू कामगार समन्वय समितीचे ज्येष्ठ नेते कॉ. उदय भट, ज्ञानेश पाटील आणि राजू वंजारे यांनी आंदोलनाला मार्गदर्शन केले. पुण्यातून आनंद आधार घरेलू कामगार संघटनेच्या संस्थापिका अनिता गोरे यांच्या नेतृत्वाखाली मोठ्या संख्येने महिला कामगार सहभागी झाल्या.
या वेळी महेंद्र जैन जांगडे, कौशल्य इजगज, मंगल सूर्यवंशी, अंजना देडे, ज्योती, सारिका साळवे चौहान, प्रमिला शिर्के, गोपिका सुरवंशी, पुजा मोरे, अनिता शेलार, निता काळे, पद्मिनी म्हेत्रे आदी पदाधिकारी व कार्यकर्त्यांची उपस्थिती होती.
आंदोलनादरम्यान महिलांनी घोषणाबाजी करत आपल्या मागण्यांकडे शासनाचे लक्ष वेधले. आंदोलकांनी सरकारकडे काही प्रमुख मागण्या मांडल्या. त्यामध्ये घरेलू कामगारांना सामाजिक सुरक्षा योजना लागू करणे, किमान वेतन कायद्याची काटेकोर अंमलबजावणी करणे, घरेलू कामगारांच्या कल्याणासाठी दरवर्षी किमान १०० कोटी रुपयांची तरतूद करणे तसेच ६० वर्षांवरील महिला घरेलू कामगारांना दरमहा किमान ५,००० रुपयांची पेन्शन योजना तात्काळ लागू करावी, अशी मागणी करण्यात आली.
याशिवाय सध्या वाढत असलेल्या डिजिटल प्लॅटफॉर्मद्वारे घरकामासाठी कामगार पुरवणाऱ्या “बुक माय बाई” आणि “अर्बन कंपनी” सारख्या ॲप कंपन्यांना कायद्याच्या चौकटीत आणून घरेलू कामगारांचे शोषण थांबवावे आणि त्यांना योग्य मोबदला व संरक्षण मिळावे, अशीही मागणी आंदोलकांनी केली.
आंदोलनानंतर या सर्व मागण्यांचे निवेदन शासनाला देण्यात आले. सरकारने घरेलू कामगारांच्या प्रश्नांकडे गांभीर्याने लक्ष देऊन तातडीने निर्णय घ्यावा, अन्यथा येत्या काळात राज्यभर अधिक तीव्र आंदोलन उभारण्याचा इशारा संघटनेच्या पदाधिकाऱ्यांनी दिला.
Editer sunil thorat
