महिला पोलिसाच्या घरावर चोरट्यांचा डल्ला ; रोख रकमेसह सुमारे ९ लाखांचे दागिने लंपास…
लोणी काळभोर (ता. हवेली) : हवेली तालुक्यातील थेऊर ग्रामपंचायत हद्दीतील कांबळे वस्ती परिसरात एका महिला पोलिसाच्या घरात चोरट्यांनी घरफोडी करून रोख रकमेसह सोन्या-चांदीचे दागिने लंपास केल्याची घटना उघडकीस आली आहे. ही घटना बुधवार (दि. ११ मार्च) रोजी दुपारी साडेतीनच्या सुमारास उघडकीस आली.
याप्रकरणी पुंडलीक तानाजी थोरात (वय ३८, रा. कांबळे वस्ती, थेऊर रोड, ता. हवेली) यांनी लोणी काळभोर पोलिस ठाण्यात फिर्याद दिली असून अज्ञात चोरट्यांविरोधात गुन्हा दाखल करण्यात आला आहे.
पोलीस सूत्रांनी दिलेल्या माहितीनुसार, पुंडलीक थोरात यांच्या पत्नी अश्विनी पवार या लोणी काळभोर पोलिस ठाण्यात महिला पोलिस कर्मचारी म्हणून कार्यरत आहेत. बुधवारी सकाळी नेहमीप्रमाणे मुलगी अनुजा (वय १०) शाळेत गेली, तर अश्विनी पवार या ड्युटीसाठी बाहेर पडल्या. पुंडलीक थोरात हे सेकंड शिफ्ट असल्याने दुपारी सुमारे १.४० वाजण्याच्या सुमारास घराला कुलूप लावून कामावर गेले.
दुपारी साडेतीनच्या सुमारास मुलगी अनुजा शाळेतून घरी परतली असता मुख्य दरवाजाचे कुलूप तुटलेले दिसून आले. तिने ही बाब खाली राहणाऱ्या भाडेकरू गौरी खोत यांना सांगितली. त्यानंतर त्यांनी तातडीने पुंडलीक थोरात यांना फोन करून माहिती दिली. थोरात तातडीने घरी परतले असता घरातील लोखंडी कपाटाचे कुलूपही तोडलेले दिसून आले आणि घरातील वस्तू अस्ताव्यस्त पडलेल्या होत्या.
कपाटातील लॉकर तपासला असता त्यातील २० ग्रॅमचे सोन्याचे गंठण, ५ ग्रॅम वजनाचे दोन टॉप्स, १० ग्रॅमची चैन, ११ ग्रॅमचे दोन झुमके, १० ग्रॅमची अंगठी, २ ग्रॅमचे दोन बदाम तसेच चांदीचे पैंजण (२ जोड), जोडवे आणि सुमारे २५ हजार रुपयांची रोख रक्कम असा एकूण चालू बाजारभावानुसार सुमारे ९ लाखांहून अधिक रुपयांचा ऐवज अज्ञात चोरट्यांनी लंपास केला.
या प्रकरणी लोणी काळभोर पोलिस ठाण्यात अज्ञात चोरट्यांविरोधात गुन्हा दाखल करण्यात आला असून पुढील तपास पोलिसांकडून सुरू आहे.
Editer sunil thorat
