हडपसर (पुणे) : जे. एस. पी. एम. जयवंतराव सावंत इन्स्टिट्यूट ऑफ फार्मसी येथे “जागतिक स्तरावर फार्मसी विद्यार्थ्यांसाठी उपलब्ध करिअर संधी व फार्मसीमधील विविध नियम” या विषयावर प्रेरणादायी गेस्ट लेक्चरचे आयोजन करण्यात आले. या व्याख्यानात आयटी कन्सल्टंट व मेडिकल हेल्थ प्रोफेशनल गणेश चांदोरे यांनी विद्यार्थ्यांना जागतिक फार्मा क्षेत्रातील बदलते ट्रेंड, रोजगाराच्या संधी तसेच भविष्यातील करिअर मार्गांबाबत सविस्तर मार्गदर्शन केले.
आपल्या व्याख्यानात त्यांनी फार्मसी क्षेत्रातील वाढती जागतिक मागणी, विविध आंतरराष्ट्रीय प्रवेश परीक्षा तसेच रिसर्च, क्लिनिकल ट्रायल्स, फार्माकोव्हिजिलन्स, ड्रग डेव्हलपमेंट आणि फार्मा इंडस्ट्रीमधील विविध करिअर पर्याय याविषयी माहिती दिली. परदेशातील औषधनिर्मिती व आरोग्य व्यवस्थेत लागू असलेल्या विविध कायदे व नियामक प्रणालींबाबतही त्यांनी विद्यार्थ्यांना सविस्तर माहिती दिली. विविध देशांमध्ये औषधांच्या गुणवत्ता नियंत्रणासाठी व रुग्णांच्या सुरक्षिततेसाठी कठोर नियम लागू केलेले असून त्या अनुषंगाने फार्मासिस्टची भूमिका अत्यंत महत्त्वाची असल्याचे त्यांनी स्पष्ट केले.
परदेशात प्रशिक्षित व कौशल्यपूर्ण फार्मासिस्टची मोठ्या प्रमाणावर मागणी असून हॉस्पिटल फार्मसी, क्लिनिकल रिसर्च, रेग्युलेटरी अफेअर्स, फार्माकोव्हिजिलन्स, मेडिकल रायटिंग आणि फार्मा उद्योगात अनेक करिअर संधी उपलब्ध असल्याचे त्यांनी सांगितले.
तसेच सध्या फार्मा उद्योगात Artificial Intelligence आणि डिजिटल तंत्रज्ञानाचा वापर झपाट्याने वाढत असल्याचे त्यांनी नमूद केले. औषध शोध प्रक्रिया, क्लिनिकल ट्रायल्सचे विश्लेषण, रुग्णांचा डेटा अभ्यास तसेच नवीन औषधांच्या विकासासाठी एआय महत्त्वाची भूमिका बजावत असल्याचे त्यांनी स्पष्ट केले. या आधुनिक तंत्रज्ञानामुळे संशोधन अधिक वेगाने आणि अचूकपणे होण्यास मदत होत असून भविष्यात फार्मसी विद्यार्थ्यांसाठी या क्षेत्रात मोठ्या प्रमाणावर संधी उपलब्ध होणार असल्याचे त्यांनी सांगितले.
फार्मसी आणि इन्फॉर्मेशन टेक्नॉलॉजी यांच्या संगमातून आरोग्यसेवेत नवनवीन उपचार पद्धती विकसित होत असून डिजिटल हेल्थकेअर, डेटा अॅनालिटिक्स आणि एआय यांसारख्या क्षेत्रांमध्येही फार्मसी विद्यार्थ्यांसाठी मोठ्या प्रमाणात संधी निर्माण होत असल्याचे त्यांनी नमूद केले. रुग्णांना अधिक गुणवत्तापूर्ण व परिणामकारक आरोग्यसेवा देण्यात फार्मसी क्षेत्राची भूमिका दिवसेंदिवस महत्त्वाची होत असल्याचे त्यांनी सांगितले.
या कार्यक्रमाला जेएसपीएम हडपसर कॅम्पसचे संचालक डॉ. वसंत बुगडे, डॉ. मारुती काळबांडे तसेच महाविद्यालयाचे प्राचार्य डॉ. प्रफुल्ल आडकर उपस्थित होते.
कार्यक्रमाचे आयोजन प्रा. स्वप्नील गाडेकर यांनी केले. या व्याख्यानाला विद्यार्थ्यांचा उत्स्फूर्त प्रतिसाद मिळाला. कार्यक्रमाच्या यशस्वी आयोजनासाठी प्रा. अनुराधा पाटील, प्रा. निकिता कोलते, प्रा. प्रगती लगदिवे, प्रा. रविराज जाधव, प्रा. चेतन मामडगे, प्रा. तनुजा काशीद तसेच स्वप्नाली सावंत, प्रियांका महाजन, विवेक थोरात, स्वाती माकोने, रुपाली शिंदे, प्रतीक्षा थोरात, ऋतुजा दाते, पांडुरंग पवार, आकांक्षा जाधव आणि कमल बनसोडे यांनी सहकार्य केले.
Editer sunil thorat
