महाराष्ट्र बोर्ड पेपर लीकच्या नावाखाली विद्यार्थ्यांची फसवणूक ; शिवाजीनगर पोलिसांकडून १८ वर्षीय तरुणाचा पर्दाफाश…
पुणे : महाराष्ट्र राज्य माध्यमिक व उच्च माध्यमिक शिक्षण मंडळाच्या (महाराष्ट्र बोर्ड) परीक्षेची प्रश्नपत्रिका लीक असल्याचा बनाव करून विद्यार्थ्यांची आर्थिक फसवणूक केल्याचा प्रकार उघडकीस आला आहे. या प्रकरणी शिवाजीनगर पोलिसांनी चैतन्य विनोद शेंडे (वय १८) याला ताब्यात घेऊन चौकशी केली असता त्याने टेलिग्रामद्वारे केलेल्या फसवणुकीची पद्धत उघड केली.
पोलीस तपासात समोर आलेल्या माहितीनुसार, आरोपी टेलिग्राम या सोशल मीडिया प्लॅटफॉर्मवरील तांत्रिक सुविधेचा गैरवापर करून विद्यार्थ्यांना पेपर लीक झाल्याचा भास निर्माण करत होता. टेलिग्रामवर एकदा पीडीएफ फाईल अपलोड केल्यानंतर ती नंतर बदलता येते. फाईल बदलली तरी मूळ अपलोडची वेळ (टाईमस्टॅम्प) तशीच राहते आणि फक्त “Edited” अशी नोंद दिसते. याच सुविधेचा वापर करून आरोपीने फसवणूक केली.
चौकशीत आरोपीने सांगितले की, तो परीक्षेच्या एक दिवस आधी टेलिग्रामवर पासवर्ड-प्रोटेक्टेड पीडीएफ फाईल अपलोड करत असे. त्यानंतर संबंधित टेलिग्राम ग्रुपमध्ये “माझ्याकडे परीक्षेची प्रश्नपत्रिका आहे” असा दावा करून ती फक्त ६०० रुपयांत देण्याची ऑफर देत असे. काही विद्यार्थ्यांनी पैसे पाठवल्यानंतर आरोपी त्यांना तात्काळ ब्लॉक करत असे.
दरम्यान, परीक्षा संपल्यानंतर तो प्रत्यक्ष प्रश्नपत्रिका मिळवून आधी अपलोड केलेल्या पासवर्ड असलेल्या पीडीएफच्या जागी ती फाईल बदलत असे. त्यामुळे त्या फाईलवर जुनाच वेळ दिसत राहिल्याने पाहणाऱ्यांना प्रश्नपत्रिका परीक्षेपूर्वीच अपलोड केली होती असा भास निर्माण होत असे.
पोलीसांच्या मते, टेलिग्रामवरील “फाईल रिप्लेस” सुविधेचा वापर करून आरोपीने खोटी कालमर्यादा तयार केली आणि विद्यार्थ्यांना प्रश्नपत्रिका लीक झाल्याचा विश्वास बसवून त्यांची आर्थिक फसवणूक केली. या प्रकरणाचा पुढील तपास शिवाजीनगर पोलीस ठाण्याकडून सुरू आहे.
Editer sunil thorat
