लोणी काळभोर (ता. हवेली) : घरपोच सेवा देत असल्याचा दावा करणाऱ्या लोणी काळभोर गॅस एजन्सी समोर गॅस सिलेंडरसाठी नागरिकांच्या लांबलचक रांगा लागल्याचे चित्र पाहायला मिळत आहे. घरपोच सेवा उपलब्ध असल्याचे सांगितले जात असले तरी प्रत्यक्षात नागरिकांना तासंतास रांगेत उभे राहूनही सिलेंडर मिळत नसल्याची तक्रार परिसरातील नागरिकांकडून व्यक्त होत आहे.
कदमवाकवस्ती व लोणी काळभोर परिसरात मागील काही दिवसांपासून घरगुती तसेच व्यावसायिक गॅस सिलेंडरची टंचाई जाणवत असल्याचे नागरिक सांगत आहेत. त्यामुळे अनेकांना एजन्सीसमोर प्रत्यक्ष जाऊन सिलेंडर मिळवण्यासाठी मोठ्या रांगा लावाव्या लागत आहेत. काही नागरिकांच्या मते, अनेक वेळा तासन्तास प्रतीक्षा करूनही सिलेंडर मिळत नसल्याने मोठी गैरसोय होत आहे.
दरम्यान, आंतरराष्ट्रीय पातळीवर सुरू असलेल्या तणावाच्या पार्श्वभूमीवरही या टंचाईची चर्चा सुरू आहे. विशेषतः इस्रायल, इराण आणि अमेरिका यांच्यातील संघर्षामुळे इंधन पुरवठ्यावर परिणाम झाल्याची चर्चा स्थानिकांमध्ये होत आहे. याचा परिणाम घरगुती तसेच व्यावसायिक गॅस सिलेंडरच्या उपलब्धतेवर झाल्याचे बोलले जात आहे. गॅस टंचाईमुळे अनेक हॉटेल व्यावसायिकांनाही आर्थिक फटका बसत असल्याचे सांगितले जात आहे.
दरम्यान, सिलेंडर पुरवठा सुरळीत नसल्याने परिसरात गॅस सिलेंडरचा काळाबाजार सुरू असल्याचाही आरोप नागरिकांकडून केला जात आहे. काही ठिकाणी घरगुती तसेच व्यावसायिक सिलेंडर चढ्या दराने विकले जात असल्याची चर्चा असून दुप्पट पैसे घेऊन गुप्तपणे सिलेंडर विक्री होत असल्याचे नागरिक सांगत आहेत. त्यामुळे प्रशासनाने या प्रकाराची गंभीर दखल घेऊन बेकायदेशीररित्या गॅस सिलेंडर विक्री करणाऱ्यांवर कठोर कारवाई करावी, अशी मागणी जोर धरत आहे.
या संदर्भात लोणी काळभोर येथील एजन्सीचे संचालक राहुल क्षीरसागर यांनी सांगितले की, गॅसचा नियमित पुरवठा सुरू आहे. जेवढी बुकिंग होते तेवढ्याच प्रमाणात सिलेंडरचा सप्लाय केला जात आहे. गॅस बुकिंगसाठी ४५ दिवसांची मुदत असून सिलेंडर घेण्यासाठी ओटीपी आवश्यक आहे. एजन्सी कार्यालयाजवळ नागरिकांची मोठी गर्दी होत असल्यामुळे काही वेळा घरपोच वितरणावर परिणाम होत असल्याचे त्यांनी स्पष्ट केले.
Editer sunil thorat
