परंपरा, ताकद आणि थरार; लोणी काळभोरचा आखाडा ठरला सुपरहिट!

कदमवाकवस्ती (ता. हवेली) : परंपरा, ताकद आणि थरार यांचा संगम अनुभवायला मिळाला तो लोणी काळभोर येथील श्रीमंत अंबरनाथ यात्रेनिमित्त भरविण्यात आलेल्या भव्य कुस्ती आखाड्यात. नामांकित पैलवानांची उपस्थिती, लाखोंची बक्षिसे आणि हजारो कुस्तीप्रेमींची उस्फूर्त गर्दी यामुळे यंदाचा आखाडा अक्षरशः ऐतिहासिक ठरला.

गुरुवार (दि. २ एप्रिल) आणि शुक्रवार (दि. ३ एप्रिल) रोजी पार पडलेल्या यात्रेच्या निमित्ताने शुक्रवारी दुपारनंतर कुस्ती स्पर्धांना सुरुवात झाली. ग्रामदैवत श्रीमंत अंबरनाथाच्या पारंपरिक मिरवणुकीनंतर जल्लोषात आखाड्याचे उद्घाटन झाले. सुरुवातीला छोट्या कुस्त्यांनी रंगत आणत वातावरण तापवले, तर त्यानंतर झालेल्या तब्बल ६१ निकाली कुस्त्यांनी प्रेक्षकांना शेवटपर्यंत खिळवून ठेवले.

या महासंग्रामातील सर्वात चर्चेची ठरलेली अंतिम कुस्ती २ लाख २१ हजार रुपयांच्या बक्षिसासाठी झाली. महाराष्ट्र केसरी पै. सिकंदर शेख आणि महाराष्ट्र केसरी पै. पृथ्वीराज मोहोळ यांच्यात झालेली ही लढत अत्यंत चुरशीची ठरली. दोन्ही मल्लांनी ताकदीचे आणि कौशल्याचे उत्कृष्ट प्रदर्शन करत प्रेक्षकांची दाद मिळवली. अखेर ही झुंज इतकी समसमान झाली की निकाल बरोबरीत जाहीर करण्यात आला.

दुसऱ्या क्रमांकाच्या २ लाख रुपयांच्या कुस्तीत हिंदकेसरी विक्रांत कुमार यांनी दीपक हुडा यांचा पराभव करत आपली ताकद सिद्ध केली. तिसऱ्या क्रमांकाच्या दीड लाख रुपयांच्या कुस्तीत महाराष्ट्र केसरी शिवराज राक्षे यांनी हरियाणाच्या जसपाल सिंगला चित्तपट केले. तर चौथ्या क्रमांकाच्या कुस्तीत कोल्हापूरच्या गंगावेस तालमीचा जयदीप पाटील यांनी सैन्यदलाच्या अमित कुमारला नमवून प्रेक्षकांची जोरदार दाद मिळवली.

महिला कुस्तीने वेधले विशेष लक्ष :

या भव्य आखाड्यात महिला कुस्तीनेही विशेष आकर्षण ठरवले. बहुली (ता. हवेली) येथील १७ वर्षीय संस्कृती गायकवाड (अजिंक्य तारा रामभाऊ सासवडे तालीम) दिल्ली येथील छत्रसाल स्टेडियममध्ये १७ वर्षाखालील गटात ब्राँझ पदक विजेती मानसी बोरकर हिच्याविरुद्ध दमदार लढत दिली. या अत्यंत चुरशीच्या सामन्यात संस्कृती गायकवाड हिने विजय मिळवत आपली क्षमता सिद्ध केली. या आखाड्यातील ही एकमेव महिला कुस्ती ठरली आणि प्रेक्षकांनीही तिला उत्स्फूर्त दाद दिली.

या जंगी आखाड्यात एकूण सुमारे ३० लाख रुपयांची रोख बक्षिसे विजेत्या मल्लांना देण्यात आली. विशेष म्हणजे, तब्बल दोन कोटी रुपये खर्चून उभारण्यात आलेल्या आधुनिक आखाड्यात प्रेक्षकांसाठी तीन डिजिटल स्क्रीनची सुविधा उपलब्ध करून देण्यात आली होती. त्यामुळे प्रत्येक कुस्तीचा थरार अधिक स्पष्टपणे अनुभवता आला.

याशिवाय, मोफत पिण्याच्या पाण्याची उत्कृष्ट व्यवस्था, बसण्याची सुटसुटीत सोय आणि यूट्यूबवरून थेट प्रक्षेपण यामुळे प्रत्यक्ष तसेच ऑनलाईन माध्यमातूनही हजारो प्रेक्षकांनी कुस्त्यांचा आनंद घेतला. परिसरात पावसाची शक्यता वर्तवण्यात आली असतानाही आखाड्याच्या वेळेत पाऊस न पडल्याने कार्यक्रम निर्विघ्न पार पडला. सायंकाळी ४ वाजता सुरू झालेला हा थरार रात्री साडेदहापर्यंत रंगत राहिला.

या भव्य आयोजनासाठी २००१ सालचे महाराष्ट्र केसरी पै. राहुल काळभोर, बाजार समिती संचालक प्रशांत काळभोर, लोणी काळभोर प्रशासक सरपंच नागेश काळभोर, तसेच सनी काळभोर, भरत काळभोर, नंदू पाटील काळभोर, राजेंद्र काळभोर, युवराज काळभोर, योगेश काळभोर, सुशील महाराज काळभोर, विशाल गुजर, गणेश कांबळे, कमलेश काळभोर यांच्यासह काळभैरवनाथ-अंबरनाथ देवस्थान ट्रस्ट, ग्रामपंचायत पदाधिकारी आणि स्थानिक ग्रामस्थांनी मोठे परिश्रम घेतले.

राज्यभरातून आलेल्या नामांकित मल्लांनी आणि कुस्तीप्रेमींनी या भव्य आयोजनाचे कौतुक करत लोणी काळभोरच्या आखाड्याला यंदा विशेष मानाचा तुरा मिळाल्याची भावना व्यक्त केली.

Editer sunil thorat