अवैध धंदे ‘बंद’च्या दाव्यांमागचे वास्तव उघड ; लोणी काळभोरमध्ये अवैध हातभट्टीवर धडक कारवाई, २.९५ लाखांचा मुद्देमाल जप्त…
लोणी काळभोर (ता. हवेली) : लोणी काळभोर पोलीस स्टेशन हद्दीत अवैध धंदे पूर्णपणे बंद असल्याचे सांगितले जात असतानाच प्रत्यक्षात ते सुरूच असल्याचे चित्र पुन्हा एकदा समोर आले आहे. पोलिसांनी अवैध हातभट्टी दारू व्यवसायावर केलेल्या धडक कारवाईत २ लाख ९५ हजार रुपयांचा मुद्देमाल जप्त करत या दाव्यांमागचे वास्तव उघड केले आहे. पुणे शहर पोलीस आयुक्तालय यांच्या आदेशानुसार अवैध धंद्यांचे समूळ उच्चाटन करण्यासाठी विशेष मोहीम राबविण्यात येत आहे. त्यानुसार वरिष्ठ पोलीस निरीक्षक राजेंद्र पन्हाळे यांनी तपास पथकाला मार्गदर्शन करत प्रभावी कारवाईचे आदेश दिले.
दि. ४ एप्रिल २०२६ रोजी सकाळी सुमारे ९.१५ वाजता गस्तीदरम्यान पोलिसांना लोणी काळभोर येथील आलमगीर जामा मशिद कब्रस्तान परिसरात संशयास्पद हालचाल आढळून आली. एका पत्र्याच्या शेडमध्ये मुबारक जाफर गड्डे (वय ४८) व बानो मुबारक गड्डे (वय ४०) हे ५०० लिटरच्या टाकीत साठवलेली सुमारे ४५० लिटर गावठी हातभट्टी दारू प्लास्टिक कॅनमध्ये भरून विक्रीसाठी तयार करत असल्याचे आढळले.
तत्काळ छापा टाकून पोलिसांनी ४५,००० रुपयांची दारू, तसेच वाहतुकीसाठी वापरण्यात येणारी Maruti Suzuki Alto कार (१.५० लाख), TVS Jupiter (५० हजार) आणि Honda Activa (५० हजार) असा एकूण २.९५ लाखांचा मुद्देमाल जप्त केला.
तपासात आरोपींनी ही दारू समीर संजय राठोड (वय २३, रा. शिंदवणे) याच्याकडून घेतल्याचे कबूल केले. त्यानुसार पोलिसांनी शिंदवणे येथे जाऊन त्यालाही ताब्यात घेतले. या प्रकरणी महाराष्ट्र दारुबंदी अधिनियम कलम ६५(ई) अंतर्गत गुन्हा दाखल करण्यात आला आहे.
ही कारवाई पोलीस उप आयुक्त राजकुमार शिंदे, सहायक पोलीस आयुक्त अनुराधा उदमले, वरिष्ठ पोलीस निरीक्षक राजेंद्र पन्हाळे, पोलीस निरीक्षक (गुन्हे) स्मिता पाटील यांच्या मार्गदर्शनाखाली पार पडली.
तसेच पोलीस उपनिरीक्षक दिगंबर सोनटक्के, पोलीस हवालदार माने, सागर जगदाळे, पोलीस अंमलदार दडस, अशोक गिरी, सोनवणे व महिला पोलीस अंमलदार पोळ यांच्या पथकाने ही कारवाई यशस्वीरीत्या केली.
‘बंद’च्या दाव्यांवर प्रश्नचिन्ह ?
स्थानिक पातळीवर अवैध धंदे बंद झाल्याचे वारंवार सांगितले जात असले, तरी अशा प्रकारच्या कारवायांमधून वास्तव वेगळेच असल्याचे दिसून येत आहे. पोलिसांची कारवाई कौतुकास्पद असली तरी, हे धंदे अजूनही सुरूच असल्याने प्रशासनाच्या दाव्यांवर प्रश्नचिन्ह निर्माण झाले आहे. नागरिकांमध्येही याबाबत नाराजी व्यक्त होत असून, केवळ छापेमारीपुरते न राहता अवैध धंद्यांचे संपूर्ण उच्चाटन करण्यासाठी सातत्यपूर्ण आणि कठोर उपाययोजना करण्याची मागणी होत आहे.
पोलिसांनी मात्र अशा कारवाया पुढेही सुरू ठेवण्याचा इशारा दिला असून, अवैध व्यवसायांना आळा घालण्यासाठी मोहीम अधिक तीव्र करण्यात येणार असल्याचे स्पष्ट केले आहे.
