ग्राहक कल्याण फाउंडेशनमध्ये सत्तासंघर्षाचा स्फोट ; अध्यक्षांवर नियमभंगाचे आरोप, धर्मादाय आयुक्तांकडे तक्रारीची तयारी…
उरुळी कांचन (ता. हवेली) : ग्राहकांच्या हक्कांसाठी काम करणाऱ्या ग्राहक कल्याण फाउंडेशनमध्येच सध्या सत्तासंघर्ष उफाळून आल्याचे चित्र समोर आले आहे. रविवारी (दि. ५ एप्रिल २०२६) रॉयल बँक्वेट हॉल येथे पार पडलेल्या राज्य कार्यकारिणीच्या बैठकीत अध्यक्षपदाच्या मुद्यावरून तुफान गदारोळ उसळला. आरोप-प्रत्यारोप, शब्दिक चकमकी आणि आक्रमक भूमिकांमुळे बैठक अक्षरशः विस्कळीत झाली.
संस्थेच्या घटनेनुसार अध्यक्षपदाची मुदत तीन वर्षांची असताना सध्याचे अध्यक्ष तब्बल पाच वर्षांपासून पदावर कायम असल्याचा गंभीर आरोप कार्यकारिणी सदस्यांनी बैठकीतच केला. विशेष म्हणजे, हा मुद्दा नवीन नसून मागील बैठकीतही चर्चेत आला होता. त्यावेळी “पुढील बैठकीत निर्णय घेऊ” असे सांगत विषय पुढे ढकलण्यात आल्याचा आरोप सदस्यांनी केला. मात्र, पुन्हा एकदा निर्णय टाळल्याने संतप्त सदस्यांनी उघड बंड पुकारले.
कार्यकारिणी सदस्य सिताराम बवले आणि प्रविण गव्हाणे यांनी बैठकीत आक्रमक पवित्रा घेत अध्यक्षांच्या कारभारावर थेट हल्लाबोल केला. “संस्थेचे कामकाज पूर्णपणे नियमबाह्य पद्धतीने सुरू आहे. काही बेकायदेशीर कृत्यांना थेट किंवा अप्रत्यक्ष पाठबळ दिले जात आहे. संस्थेच्या घटनेची पायमल्ली करून मनमानी कारभार सुरू आहे,” असा गंभीर आरोप त्यांनी केला. या आरोपांमुळे बैठकीत वातावरण आणखी तापले.
वाद अधिक चिघळत असताना बवले आणि गव्हाणे यांनी स्पष्ट इशारा दिला की, “या सर्व प्रकाराची सविस्तर तक्रार धर्मादाय आयुक्तांकडे दाखल करण्यात येणार असून संस्थेच्या कारभाराची चौकशी व्हावी, अशी मागणी केली जाईल.” त्यामुळे हा वाद केवळ अंतर्गत राहिला नसून आता कायदेशीर पातळीवर जाण्याची शक्यता निर्माण झाली आहे.
दरम्यान, अध्यक्षपदाच्या निकषांवरूनही संस्थेत दोन गट पडल्याचे स्पष्ट झाले. काही सदस्यांनी अनुभवी, ज्येष्ठ आणि दीर्घकालीन कार्याचा अनुभव असलेले नेतृत्व आवश्यक असल्याची भूमिका घेतली, तर दुसरीकडे सक्रिय कार्यकर्त्यांनी “संस्थेला आता तरुण, ऊर्जावान आणि ग्राहकांच्या तक्रारी तत्काळ सोडवणारे नेतृत्व हवे” अशी ठाम मागणी करत विद्यमान नेतृत्वावर अप्रत्यक्ष नाराजी व्यक्त केली.
बैठकीदरम्यान अनेक वेळा गोंधळ निर्माण झाला. काही वेळा जोरदार शब्दिक वाद झाले, तर काही सदस्यांनी उभे राहून निषेध नोंदवला. परिणामी, बैठकीचा मुख्य अजेंडा असलेला अध्यक्षपदाचा निर्णय पुन्हा एकदा रखडला. संस्थेतील अंतर्गत कलह आता चव्हाट्यावर आल्याचे स्पष्ट झाले आहे.
या सर्व आरोपांवर प्रतिक्रिया देताना संस्थापक अध्यक्ष तुकाराम निंबाळकर यांनी पलटवार करत आरोप फेटाळून लावले. “प्रविण गव्हाणे आणि सिताराम बवले हे केवळ वाद घालण्यासाठीच बैठकीला येतात. गेल्या दीड वर्षात ते एकाही बैठकीला उपस्थित नव्हते. संस्थेमध्ये कोणतीही अनियमितता किंवा अपारदर्शकता नाही. संस्था त्यांच्या शिवायही व्यवस्थित चालू शकते,” असे त्यांनी स्पष्ट केले.
दरम्यान, संस्थेतील काही सक्रिय कार्यकर्त्यांनी गव्हाणे आणि बवले यांच्या समर्थनार्थ उघडपणे भूमिका घेतल्याने संघर्ष अधिक तीव्र होण्याची चिन्हे आहेत. या पार्श्वभूमीवर संस्थेमध्ये नेतृत्व बदल होणार का, नवीन अध्यक्षाची नियुक्ती होणार का, की विद्यमान अध्यक्षच कायम राहणार—याबाबत तर्कवितर्कांना उधाण आले आहे.
एकूणच, ग्राहकांच्या हक्कांसाठी लढणाऱ्या संस्थेमध्येच सध्या अंतर्गत सत्तासंघर्ष, आरोप-प्रत्यारोप आणि अविश्वासाचे वातावरण निर्माण झाले असून, आता धर्मादाय आयुक्तांकडे होणारी तक्रार आणि त्यानंतरची संभाव्य कारवाई याकडे सर्वांचे लक्ष लागले आहे.
Editer sunil thorat
