पतीला नकार, प्रियकराची निवड ; १९ वर्षीय विवाहितेला हायकोर्टाचा दिलासा…
भोपाळ : मध्य प्रदेश उच्च न्यायालयाच्या ग्वाल्हेर खंडपीठाने वैयक्तिक स्वातंत्र्याला अधोरेखित करणारा महत्त्वपूर्ण निकाल देत १९ वर्षीय विवाहितेला तिच्या इच्छेनुसार प्रियकरासोबत राहण्याची परवानगी दिली आहे. सज्ञान व्यक्तीला स्वतःच्या आयुष्याबाबत निर्णय घेण्याचा पूर्ण अधिकार आहे, असे स्पष्ट करत न्यायालयाने कोणालाही तिच्या इच्छेविरुद्ध जबरदस्तीने रोखता येणार नाही, असे नमूद केले.
ही सुनावणी पतीने दाखल केलेल्या याचिकेवर झाली. पत्नीला परत आणण्यासाठी पतीने न्यायालयात धाव घेत पत्नीला एका तरुणाने बेकायदेशीरपणे ठेवले असल्याचा आरोप केला होता. पोलिसांनी संबंधित तरुणीला ताब्यात घेत वन स्टॉप सेंटरमध्ये ठेवले आणि नंतर न्यायालयात हजर केले.
सुनावणीदरम्यान तरुणीचे आई-वडील, पती आणि कथित प्रियकर उपस्थित होते. न्यायमूर्तींनी तरुणीकडून तिची भूमिका जाणून घेतली असता, “मी सज्ञान आहे आणि मला माझ्या इच्छेनुसार जगायचे आहे. मला ना पतीसोबत राहायचे आहे ना आई-वडिलांसोबत,” असे तिने स्पष्ट सांगितले.
तिने वैवाहिक आयुष्यातील अडचणींचा उल्लेख करत पतीचे वय ४० वर्षे असून स्वतःचे वय १९ असल्यामुळे नात्यात समतोल नसल्याचे सांगितले. तसेच पतीकडून योग्य वागणूक मिळत नसल्याची तक्रारही तिने केली.
न्यायालयाने प्रकरणाचे गांभीर्य लक्षात घेऊन समुपदेशन केले, मात्र त्यानंतरही तरुणी आपल्या निर्णयावर ठाम राहिली. तिच्या प्रियकरानेही न्यायालयासमोर तिची योग्य काळजी घेण्याची हमी दिली.
या सर्व बाबींचा विचार करून न्यायमूर्ती आनंद पाठक आणि पुष्पेंद्र यादव यांच्या खंडपीठाने तरुणीच्या स्वातंत्र्याचा सन्मान राखत तिच्या निर्णयाला मान्यता दिली. तसेच तिच्या सुरक्षेसाठी पुढील सहा महिने निगराणी ठेवण्याचे आदेश देत ही जबाबदारी ‘शौर्या दीदी’कडे सोपवण्यात आली आहे.
हा निकाल वैयक्तिक स्वातंत्र्य, वैवाहिक संबंध आणि कायदेशीर अधिकार याबाबत महत्त्वपूर्ण ठरत आहे.
Editer sunil thorat
