कदमवाकवस्ती (ता. हवेली) : लोणी काळभोर येथे एमआयटी आर्ट, डिझाईन अँड टेक्नॉलॉजी (एमआयटी-एडीटी) विद्यापीठात रंगलेल्या आंतरमहाविद्यालयीन क्रिकेट स्पर्धेत अजिंक्य डी. वाय. पाटील विद्यापीठ, लोहगाव (पुणे) संघाने दमदार कामगिरी करत विजेतेपद पटकावले. अंतिम सामन्यात त्यांनी एमआयटी कॉलेज ऑफ मॅनेजमेंट (मिटकॉम), लोणी काळभोर संघावर ४१ धावांनी मात करत स्पर्धेवर आपली मोहोर उमटवली.
संस्थेचे कार्याध्यक्ष तथा प्र. कुलपती प्रा. डॉ. मंगेश कराड यांच्या ६० व्या वाढदिवसानिमित्त आयोजित या स्पर्धेचा अंतिम सामना अत्यंत उत्साहपूर्ण वातावरणात पार पडला. अजिंक्य डी. वाय. पाटील विद्यापीठाने प्रथम फलंदाजी करत २० षटकांत ९ बाद १६५ धावांची भक्कम उभारणी केली. दिव्यांश (३७) व संग्राम घुमरे (३२) यांनी संघाला मजबूत आधार दिला. प्रत्युत्तरात एमआयटी मिटकॉम संघाला १७ षटकांत सर्वबाद १२४ धावांपर्यंतच मजल मारता आली.
विजेत्या संघाकडून सफल घिमिरे याने अष्टपैलू खेळ करत ४ बळी घेतले आणि ‘सामनावीर’ पुरस्कार पटकावला. तर स्पर्धेत एकूण ९ विकेट्स घेणाऱ्या अजिंक्य डी. वाय. पाटील विद्यापीठाच्या पुरंजय सिंह राठोड याला ‘मालिका वीर’ पुरस्काराने सन्मानित करण्यात आले.
तिसऱ्या स्थानासाठी झालेल्या सामन्यात आर्मी इन्स्टिट्यूट ऑफ टेक्नॉलॉजी, पुणे संघाने एमआयटी स्कूल ऑफ कम्प्युटिंग (एसओसी), लोणी काळभोर संघावर १७ धावांनी विजय मिळवला. आर्मी संघाने ९५ धावा केल्यानंतर एमआयटी एसओसी संघ ७७ धावांवर गारद झाला. या सामन्यात चरण कुमार डोक्कारी याने उत्कृष्ट कामगिरी करत सामनावीर पुरस्कार मिळवला.
२३ ते २७ एप्रिल २०२६ या कालावधीत विद्यापीठाच्या क्रीडा संकुलात ही स्पर्धा पार पडली. विजेते व उपविजेते संघांना प्रत्येकी ५० हजार रुपयांची रोख पारितोषिके, चषक, पदके व प्रमाणपत्रे देऊन गौरविण्यात आले. पारितोषिक वितरण सोहळ्यास कुलगुरू प्रा. डॉ. राजेश एस., कुलसचिव डॉ. महेश चोपडे, क्रीडा संचालक व शिवछत्रपती पुरस्कार विजेते प्रा. पद्माकर फड, ब्रिगेडीअर मंगेश विटेकर यांची उपस्थिती होती.
एकूणच, स्पर्धेतील रोमांचक सामने, खेळाडूंची उत्कृष्ट कामगिरी आणि प्रेक्षकांचा उत्स्फूर्त प्रतिसाद यामुळे हा क्रीडा महोत्सव यशस्वी ठरला.
Editer sunil thorat
