कदमवाकवस्ती (ता. हवेली) : भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांच्या १३५ व्या जयंतीनिमित्त कवडीपाट परिसरात अत्यंत उत्साहपूर्ण वातावरणात भव्य मिरवणूक काढण्यात आली. सामाजिक कार्यकर्ते राकेश लोंढे यांच्या पुढाकारातून आणि स्थानिक तरुणांच्या सहकार्याने आयोजित या कार्यक्रमाला नागरिकांचा मोठा प्रतिसाद मिळाला.
कवडीपाट टोल नाका ते गुजर वस्ती या मार्गावर निघालेल्या मिरवणुकीत निळ्या झेंड्यांची दिमाखदार मिरवणूक आणि “जय भीम”च्या घोषणांनी संपूर्ण परिसर दुमदुमून गेला होता. युवक, महिला, ज्येष्ठ नागरिक तसेच बालकांचा मोठ्या संख्येने सहभाग दिसून आला. विविध ठिकाणी फुलांची उधळण करून मिरवणुकीचे स्वागत करण्यात आले. काही ठिकाणी पिण्याच्या पाण्याची व अल्पोपहाराचीही व्यवस्था करण्यात आली होती.
या मिरवणुकीत अॅड. राहुल झेंडे, सामाजिक कार्यकर्ते सुशिल महाराज काळभोर, विशाल गुजर, नितीन टिळेकर, समाधान साळवे, शंकर देडे, सचिन भोसले, अभिजित पाचकुडवे, विशाल चौरघडे यांच्यासह अनेक मान्यवरांनी सहभाग घेतला. त्यांच्या उपस्थितीमुळे कार्यक्रमाला विशेष उंची प्राप्त झाली. मान्यवरांनी डॉ. आंबेडकर यांच्या विचारांचे महत्त्व अधोरेखित करत समाजात शिक्षण, समता आणि बंधुभाव जोपासण्याचे आवाहन केले.
कार्यक्रमादरम्यान कदमवाकवस्ती ग्रामपंचायत सदस्य सिमीता अगतराव लोंढे आणि आकाश काळभोर यांचा सत्कार करण्यात आला.
तसेच सरपंच चित्तरंजन गायकवाड, तंटामुक्ती समिती अध्यक्ष अभिजित बडदे व ग्रामपंचायत सदस्य पप्पू बडदे यांनीही उपस्थित राहून मिरवणुकीत सहभाग नोंदवला.
मिरवणूक शांततेत व शिस्तबद्ध पद्धतीने पार पडावी यासाठी लोणी काळभोर पोलीस स्टेशनचे पोलीस निरीक्षक राजेंद्र पन्हाळे यांच्या मार्गदर्शनाखाली कडक पोलीस बंदोबस्त ठेवण्यात आला होता. पोलीस कर्मचारी आण्णा माने, बापू वाघमोडे आणि इतर कर्मचाऱ्यांनी चोख सुरक्षा व्यवस्था राखत मिरवणूक सुरळीत पार पाडली. त्यांच्या उत्कृष्ट कामगिरीबद्दल कार्यक्रमस्थळी त्यांचा सत्कारही करण्यात आला.
एकूणच, डॉ. बाबासाहेब आंबेडकर जयंतीनिमित्त आयोजित ही भव्य मिरवणूक सामाजिक ऐक्य, बंधुभाव आणि आंबेडकर विचारांचा प्रसार करणारी ठरली. नागरिकांनी मोठ्या शिस्तीत व उत्साहात सहभाग घेत कार्यक्रम यशस्वी केला.
Editer sunil thorat
