हडपसर (पुणे) : 29 एप्रिल 2026
स्पर्धा परीक्षांच्या कठीण आणि अनिश्चिततेने भरलेल्या प्रवासात जिद्द, संयम आणि सातत्य यांच्या जोरावर यश संपादन करणाऱ्या गणेश तमनर यांची राज्य पोलीस दलातील डीवायएसपी (उपविभागीय पोलीस अधिकारी) पदी निवड झाली आहे. अनेक अपयशांना सामोरे जात अखेर मिळवलेले हे यश तरुणांसाठी प्रेरणादायी ठरत आहे.
ग्रामीण पार्श्वभूमीतून आलेल्या तमनर यांचा प्रवास अत्यंत संघर्षमय राहिला. वडील दहावी नापास तर आई सातवीपर्यंत शिक्षण घेतलेल्या कुटुंबातून त्यांनी मोठी स्वप्ने पाहिली. कोणत्याही मोठ्या कोचिंग क्लासशिवाय, केवळ ऑनलाइन साधनांच्या मदतीने त्यांनी स्पर्धा परीक्षांची तयारी सुरू ठेवली.
तमनर यांनी यूपीएससीच्या सहा मुख्य परीक्षा दिल्या आणि तीन वेळा मुलाखतीपर्यंत मजल मारली. मात्र, प्रत्येक वेळी अंतिम यश हुलकावणी देत राहिले. अनेकांनी त्यांना दिशा बदलण्याचा सल्ला दिला, तरीही “थांबू नकोस” या अंतर्मनाच्या आवाजावर विश्वास ठेवत त्यांनी आपला संघर्ष सुरूच ठेवला.
वेळेचे काटेकोर नियोजन, सकाळी लायब्ररीत नियमित अभ्यास आणि सातत्यपूर्ण मेहनत ही त्यांच्या यशाची प्रमुख सूत्रे ठरली. अखेरीस त्यांनी एमपीएससीकडे वळत आपल्या प्रयत्नांना योग्य दिशा दिली आणि डीवायएसपी पद मिळवले. ही माघार नसून योग्य वेळी घेतलेला निर्णायक निर्णय असल्याचे त्यांनी सिद्ध केले.
गणेश तमनर हे केवळ अभ्यासू विद्यार्थी नसून नम्र, मदतीस तत्पर आणि सकारात्मक व्यक्तिमत्त्व म्हणून ओळखले जातात. लायब्ररीत इतर विद्यार्थ्यांना मार्गदर्शन करत त्यांनी अनेकांना प्रेरणा दिली आहे. अभ्यासासोबतच क्रिकेटमध्येही त्यांची कामगिरी उल्लेखनीय आहे.
सध्या नियुक्तीच्या प्रतीक्षेत असतानाही त्यांनी पुन्हा यूपीएससीसाठी अभ्यास सुरू ठेवला आहे. तत्वज्ञान विषयाचा सखोल अभ्यास करत, यशाच्या उंबरठ्यावर असतानाही नव्याने सुरुवात करण्याची त्यांची तयारी त्यांच्या जिद्दीची साक्ष देते.
तमनर यांच्या प्रवासातून एक स्पष्ट संदेश मिळतो — “अपयश हे शेवट नसून नव्या सुरुवातीचे पाऊल आहे.” त्यांची ही यशोगाथा आजच्या तरुणांसाठी प्रेरणादायी ठरत आहे. “सच है, विपत्ति जब आती है, कायर को ही दहलाती है,
सूरमा नहीं विचलित होते, क्षण एक नहीं धीरज खोते…”
Editer sunil thorat
