कळंब (ता. इंदापूर) येथे घरफोडी ; वालचंदनगर पोलिसांची धडक कारवाई, १९.७१ लाखांचा मुद्देमाल जप्त…
डाँ. गजानन टिंगरे
इंदापूर (पुणे) : कळंब येथील डोंबाळे वस्तीमध्ये नुकत्याच घडलेल्या घरफोडी प्रकरणाचा वालचंदनगर पोलिसांनी जलद तपास करत पर्दाफाश केला असून, आरोपीस अटक करून तब्बल १९ लाख ७१ हजार ६०० रुपयांचा मुद्देमाल जप्त करण्यात आला आहे.
सोमवार (दि. २७) रोजी श्री संत बाळूमामा पालखी मुक्कामासाठी कळंब गावात आल्याने गावातील बहुतांश नागरिक आरतीसाठी गेले होते. याच संधीचा फायदा घेत अज्ञात चोरट्याने एका घरात घुसून सोने-चांदीचे दागिने आणि रोख रक्कम लंपास केली होती. या मोठ्या घरफोडीमुळे परिसरात खळबळ उडाली होती.
घटनेचे गांभीर्य लक्षात घेऊन पुणे ग्रामीण पोलीस अधीक्षक संदीप सिंह गिल्ल, अप्पर पोलीस अधीक्षक गणेश बिरादार, उपविभागीय पोलीस अधिकारी डॉ. सुदर्शन राठोड, तसेच पोलीस निरीक्षक प्रमोद क्षिरसागर यांच्या मार्गदर्शनाखाली वालचंदनगर पोलीस ठाण्याचे सहायक पोलीस निरीक्षक राजकुमार डुणगे व त्यांच्या पथकाने तपास सुरू केला.
तपासादरम्यान भवानीनगर परिसरात एक संशयित इसम बिनपावतीचे सोने विक्रीसंदर्भात चौकशी करत असल्याची गुप्त माहिती पोलिसांना मिळाली. त्यानुसार पोलिसांनी भवानीनगर-लाकडी रस्त्यावर सापळा रचून संशयिताला ताब्यात घेतले. चौकशीत त्याने बाळासो उर्फ अजित प्रकाश पाटील (रा. पुनगाव, ता. राधानगरी, जि. कोल्हापूर) असल्याचे सांगितले.
सखोल चौकशीत आरोपीने कळंब येथील डोंबाळे वस्तीवरील घरफोडीची कबुली दिली. त्याच्याकडून १६ लाख १८ हजार ५०० रुपये किमतीचे ११.५ तोळे सोन्याचे दागिने, ३ लाख ७८ हजार १०० रुपये किमतीचे चांदीचे दागिने आणि २५ हजार रुपये रोख असा एकूण १९ लाख ७१ हजार ६०० रुपयांचा मुद्देमाल जप्त करण्यात आला आहे.
दरम्यान, आरोपीवर कोल्हापूर जिल्ह्यातील विविध पोलीस ठाण्यांमध्ये घरफोडीचे गुन्हे दाखल असल्याचे तपासात निष्पन्न झाले आहे. सध्या आरोपीला पोलीस कोठडी देण्यात आली असून पुढील तपास सहायक पोलीस निरीक्षक राजकुमार डुणगे करत आहेत.
या कारवाईत स्थानिक गुन्हे शाखेचे सहायक पोलीस निरीक्षक कुलदीप संकपाळ, बाळासाहेब कारंडे, पोलीस हवालदार शैलेश स्वामी, गुलाबराव पाटील, किर्तीलाल गायकवाड, दादासाहेब डोईफोडे, स्वप्नील अहिवळे, अभिजीत एकशिंगे तसेच पोलीस कर्मचारी विक्रमसिंह जाधव, अभिजीत कळसकर आणि गणेश वानकर यांनी सहभाग घेतला.
Editer sunil thorat
