आधी छेडछाड, नंतर वारंवार शरीर सुखाची मागणी केल्याची धक्कादायक घटना… लोणी काळभोर.
पुणे (हवेली) : महिलेची छेडछाड करून तिच्याकडे वारंवार शरीर सुखाची मागणी केल्याची घटना लोणी काळभोर परिसरात उघडकीस आली आहे. सदर घटना नोव्हेंबर २०२३ ते फेब्रुवारी २०२५ या कालावधीत घडली आहे.
याप्रकरणी एका ४५ वर्षीय महिलेने लोणी काळभोर पोलीस ठाण्यात दिलेल्या फिर्यादीवरून दादासाहेब अंबादास नेटके (वय ५७, रा. चिखलठाणवाडी ता.श्रीगोंदा, जि-अहमदनगर) यांचेवर गुन्हा दाखल करण्यात आला आहे.
पोलीस सुत्रांनी दिलेल्या माहितीनुसार पिडीत महिला या लोणी काळभोर परिसरात आपल्या कुटुंबासोबत राहत असून त्या मशीन काम करून कुटुंबाचा उदरनिर्वाह चालवितात. तर नेटके हा शेतकरी आहे. त्या दोघांची ओळख होती. या ओळखीतून नेटके हा पिडीता घरी एकट्या असताना त्यांच्या घरी गेला. आणि त्यांच्याशी लगट करू लागला. पिडीतेने प्रतिकार केलेनंतर त्याने अश्लील वर्तन करून फिर्यादी यांच्या मनात लज्जा उत्पन्न होईल असे कृत्य करून निघून गेला.
त्यानंतरही दादासाहेब नेटके याने पिडीतेचा वारंवार पाठलाग केला. तसेच मोबाइल द्वारे संपर्क साधुन शारीरीक सबंध ठेवण्याची मागणी करुन शिवीगाळ व दमदाटी करू लागला. या वारंवार होणाऱ्या त्रासाला कंटाळून फिर्यादी यांनी लोणी काळभोर पोलीस ठाणे गाठले. आणि नेटके यांच्या विरोधात तक्रार दिली.
त्यावरून दादासाहेब नेटके यांच्यावर लोणी काळभोर पोलीस ठाण्यात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक राजेंद्र पन्हाळे यांच्या मार्गदर्शनाखाली पोलीस उपनिरीक्षक रुपाली जाधव करत आहेत.
