लोणी काळभोर पोलिसांची धडक कारवाई : गांजा विक्रेत्यावर कारवाई, सव्वा दोन लाखांचा मुद्देमाल जप्त…

तुळशीराम घुसाळकर 

लोणी काळभोर (पुणे) : गांजा विक्रीसाठी आलेल्या एका तरुणाला लोणी काळभोर पोलिसांनी ताब्यात घेतले असून त्याच्याकडून २ लाख २२ हजार रुपयांचा मुद्देमाल जप्त करण्यात आला आहे. त्याचा साथीदार मात्र पोलिसांची चाहूल लागताच फरार झाला आहे.

मिळालेल्या माहितीनुसार, दि. ९ सप्टेंबर २०२५ रोजी रात्री साडेनऊ वाजता आंग्रे वस्ती, सार्वजनीक रोड, लोणी स्टेशन परिसरात गणेश रावसाहेब गोडसे (वय २५, रा. आंग्रे वस्ती, लोणी काळभोर, मुळगाव सोनेवाडी, ता. सांगोला, जि. सोलापुर) व त्याचा साथीदार अक्षय रवि पवार (रा. लोणी काळभोर) हे गांजा विक्रीसाठी थांबले असल्याची माहिती पोलिसांना मिळाली.

यावर कारवाई करताना पोलिसांनी पाठलाग करून गोडसे याला जेरबंद केले. तर त्याचा साथीदार पवार हा पळून जाण्यात यशस्वी झाला. गोडसे याच्याकडून ११०४ ग्रॅम गांजा (किंमत २२ हजार रुपये) तसेच गुन्ह्यात वापरलेली मारुती अल्टो कार (किंमत २ लाख रुपये, क्र. MH 12 DE 4937) असा एकूण २ लाख २२ हजार रुपयांचा मुद्देमाल जप्त करण्यात आला आहे.

या प्रकरणी लोणी काळभोर पोलीस ठाण्यात गुन्हा नोंदवण्यात आला असून अटक केलेल्या गोडसे विरुद्ध NDPS कायद्यांतर्गत कारवाई करण्यात आली आहे. पुढील तपास पोलीस उपनिरीक्षक जाधव हे करत आहेत.

ही कारवाई पोलिस उपआयुक्त परिमंडळ ५ डॉ. राजकुमार शिंदे व सहाय्यक पोलिस आयुक्त हडपसर विभाग श्रीमती अनुराधा उदमले यांच्या मार्गदर्शनाखाली, वरिष्ठ पोलीस निरीक्षक राजेंद्र पन्हाळे यांच्या नेतृत्वाखाली करण्यात आली. या कारवाईत पोलीस निरीक्षक (गुन्हे) स्मिता पाटील, सहायक पोलीस निरीक्षक अंकुश बोराटे, तसेच हवालदार भोसले, माने, नागलोत, क्षिरसागर, जगदाळे, गाडे, धुमाळ व कटके यांनी सहभाग घेतला.

Editer sunil thorat