कदमवाकवस्ती ग्रामपंचायतीत शिवजयंती उत्साहात व भक्तिभावाने साजरी…
कदमवाकवस्ती (ता. हवेली) : कदमवाकवस्ती ग्रामपंचायत कार्यालयात छत्रपती शिवाजी महाराजांची जयंती मोठ्या उत्साहात व अभिमानाने साजरी करण्यात आली. सकाळी ग्रामपंचायत कार्यालय परिसरात छत्रपती शिवाजी महाराजांच्या प्रतिमेची विधीवत पूजा करून पुष्पहार अर्पण करण्यात आला. यावेळी “छत्रपती शिवाजी महाराज की जय”च्या घोषणांनी परिसर दुमदुमून गेला.
कार्यक्रमाच्या अध्यक्षस्थानी ग्रामपंचायतीचे माजी सरपंच नंदू पाटील काळभोर होते. तर उपसरपंच नासीर पठाण, ग्रामपंचायत सदस्य, कर्मचारी व स्थानिक नागरिक मोठ्या संख्येने उपस्थित होते. मान्यवरांच्या हस्ते शिवप्रतिमेचे पूजन करून अभिवादन करण्यात आले.
यावेळी बोलताना मान्यवरांनी शिवरायांचे कार्य, पराक्रम, शौर्य आणि स्वराज्य स्थापनेतील दूरदृष्टी यांचा गौरव केला. “छत्रपती शिवाजी महाराजांनी सर्वधर्मसमभाव, न्यायप्रियता आणि स्त्री-सुरक्षेचा आदर्श घालून दिला. त्यांच्या विचारांवर चालणे हीच खरी शिवजयंती साजरी करण्याची पद्धत आहे,” असे मत उपस्थितांनी व्यक्त केले.
ग्रामपंचायत प्रशासनाच्या वतीने कार्यक्रमाचे नियोजन करण्यात आले होते. कार्यक्रम शांततेत व शिस्तबद्ध पद्धतीने पार पडला. शेवटी उपस्थितांनी शिवरायांच्या कार्याचा आदर्श डोळ्यासमोर ठेवून गावाच्या विकासासाठी एकत्रितपणे काम करण्याचा निर्धार व्यक्त केला.
Editer sunil thorat
