कदमवाकवस्ती (ता. हवेली) : एम आयटी आर्ट डिझाईन अँन्ड टेक्नालाजी युनिव्हर्सिटी येथे प्रा. डॉ. मंगेश कराड यांच्या ६० व्या वाढदिवसानिमित्त आयोजित राज्यस्तरीय आमंत्रित मुष्ठीयुद्ध (बॉक्सिंग) स्पर्धा मोठ्या उत्साहात पार पडली. विविध जिल्ह्यांतील खेळाडूंनी सहभाग घेतल्याने संपूर्ण परिसरात क्रीडामय वातावरण निर्माण झाले होते.
स्पर्धा बँटमवेट, लाईटवेट, वेल्टरवेट, लाईट मिडलवेट, मिडलवेट, लाईट हेवीवेट, क्रूझरवेट आणि हेवीवेट अशा विविध वजन गटांमध्ये पार पडली. उद्घाटन अर्जुन पुरस्कारप्राप्त मुष्ठीयोद्धा गोपाल देवांग तसेच ऑलिम्पियन व अर्जुन पुरस्कारप्राप्त मनोज पिंगळे यांच्या हस्ते झाले.
यावेळी विद्यापीठाचे कुलगुरू प्रा. डॉ. राजेश एस., प्रोवोस्ट डॉ. सायली गणकर, प्र-कुलगुरू डॉ. नचिकेत ठाकूर, क्रीडा विभाग संचालक व शिवछत्रपती पुरस्कार प्राप्त प्रा. पद्माकर फड, तसेच डॉ. अतुल पाटील आदी मान्यवर उपस्थित होते. स्पर्धेनंतर सर्व वजन गटांतील विजेत्यांना सुवर्णपदके, तर उपविजेत्यांना रौप्यपदकांसह एक लाख रुपयांपेक्षा अधिकच्या पारितोषिकांनी गौरविण्यात आले.
या स्पर्धेत राज्यातील विविध नामांकित क्रीडा अकादमींच्या मुष्ठीयोद्ध्यांनी सहभाग घेतला. यात युवा विकास मंच, मनोज पिंगळे क्रीडा अकादमी, नॉकआउट बॉक्सिंग अकादमी, मुंबई बॉक्सिंग अकादमी, स्टार बॉक्सिंग अकादमी, कोंढवा बॉक्सिंग अकादमी, खराळवाडी बॉक्सिंग अकादमी, के.डी. बॉक्सिंग अकादमी, बीएमएसए अकादमी, बीव्हीजीपी बॉक्सिंग अकादमी तसेच डॉ. विश्वनाथ कराड एमआयटी क्रीडा अकादमी यांचा समावेश होता. स्पर्धेत रंगलेल्या निकराच्या लढतींनी प्रेक्षकांची उत्सुकता शिगेला पोहोचवली.
स्पर्धेअंती मिडलवेट गटात (७० ते ७५ किलो) के.डी. बॉक्सिंग अकादमी, मुंबईच्या मिथेश राठोड याला ‘सर्वोत्कृष्ट बॉक्सर’ पुरस्कार प्रदान करण्यात आला. तर हेवीवेट गटात (८५ ते ९० किलो) एमआयटी एडीटी विद्यापीठाच्या आर्या औटी याला ‘सर्वोत्कृष्ट चॅलेंजर’ म्हणून सन्मानित करण्यात आले.
या स्पर्धेमुळे राज्यातील युवा मुष्ठीयोद्ध्यांना आपली गुणवत्ता सिद्ध करण्याची संधी मिळाली असून, भविष्यात राष्ट्रीय व आंतरराष्ट्रीय स्तरावर खेळाडू घडविण्यास या उपक्रमाचा मोठा हातभार लागणार असल्याचे मत उपस्थित मान्यवरांनी व्यक्त केले.
Editer sunil thorat
