गुरुवर्यांच्या समर्थनार्थ संताप ; राष्ट्रवादीचे विकास लवांडेंवर शाईफेक…

पुणे : राष्ट्रवादी काँग्रेस शरदचंद्र पवार पक्षाचे प्रवक्ते विकास लवांडे यांच्यावर शाईफेक करण्यात आल्याची धक्कादायक घटना समोर आली आहे. “तू आमच्या गुरुवर्यांना बोलायचं नव्हतं, ते आमचं सर्वस्व आहे,” असे म्हणत काही जणांनी त्यांना अडवून शाईफेक केल्याचा आरोप करण्यात आला आहे. या घटनेमुळे राजकीय वर्तुळात खळबळ उडाली आहे.

मिळालेल्या माहितीनुसार, दशक्रिया विधीनिमित्त आयोजित कार्यक्रम आटोपून लवांडे परतत असताना निर्जनस्थळी काही जणांनी त्यांची गाडी अडवली. यावेळी वारकरी संप्रदायाशी संबंधित संग्राम भंडारे यांच्यासह काही जणांनी लवांडे यांच्यावर शाईफेक केल्याचा दावा करण्यात आला आहे. “परत जर आमच्या गुरुवर्यांविषयी काही बोलला तर लक्षात ठेव,” अशी धमकी देत मारहाण करण्याचाही प्रयत्न झाल्याचा आरोप लवांडे यांनी केला आहे.

घटनेचा व्हिडिओही सोशल मीडियावर व्हायरल होत असून त्यामध्ये काही जण लवांडे यांना घेराव घालताना दिसत आहेत. या प्रकारानंतर वारकरी संप्रदायातील काही घटकांकडून लवांडे यांच्या वक्तव्यांबद्दल तीव्र नाराजी व्यक्त करण्यात येत असल्याची चर्चा आहे.

दरम्यान, या घटनेनंतर संबंधितांवर कठोर कारवाई करण्याची मागणी करण्यात येत असून पोलिसांनी प्रकरणाची चौकशी सुरू केली आहे. हल्ल्यामागील नेमके कारण, सहभागी व्यक्तींची भूमिका आणि व्हिडिओची सत्यता याबाबत तपास सुरू असल्याची माहिती सूत्रांनी दिली.

Editer sunil thorat